സിനിമയിലും ജീവിതത്തിലും പ്രിയപ്പെട്ടവൻ

ബിഗ്സ്ക്രീനിൽ അദ്ഭുതങ്ങൾ തീർത്ത പ്രതിഭയാണ് ഐ.വി. ശശി. ആ സ്നേഹവും സൗഹൃദവും ഒരിക്കലും മറക്കാനാവില്ല

- കമൽഹാസൻ

പറഞ്ഞതിനപ്പുറം, ഞങ്ങൾക്കിടയിൽ മറന്നതും മാറ്റിവെച്ചതുമായ ഒരുപാട് കാര്യങ്ങളുണ്ടായിരുന്നു. അതെല്ലാം ബാക്കിവെച്ചിട്ടാണ് ശശി പോയത്. കണ്ടുമുട്ടലുകൾ കുറഞ്ഞുവന്ന അവസാന നാളുകളിലും ശശി ഫോണിലൂടെ എന്നോട് പറഞ്ഞുകൊണ്ടിരുന്നു: “എനിക്ക് കമലിനെ കാണണം. കുറെ സംസാരിക്കാനുണ്ട്. തൊടുപുഴയിലെ "പാപനാശത്തിന്റെ ലൊക്കേഷനിലേക്കും ഒരു രാത്രി ശശിയുടെ ശബ്ദം ഒഴുകിയെത്തി. അന്ന് ഞങ്ങൾ കുറേ സംസാരിച്ചു. പഴയകാലത്തെ ഓർമകളായിരുന്നു പങ്കുവെച്ചതിലേറെയും. വർത്തമാനം അവസാനിപ്പിക്കുമ്പോൾ ഞാൻ ശശിയോട് ചോദിച്ചു: “നിന്റെ ആരോഗ്യം ഇപ്പോൾ എങ്ങനെ?” “കുഴപ്പമില്ല. സീമ ദേഷ്യപ്പെടുന്നതുകൊണ്ട് കൃത്യസമയത്ത് ആഹാരവും മരുന്നും കഴിക്കുന്നുണ്ട്. അവൾ എനിക്കൊപ്പം ഇല്ലായിരുന്നെങ്കിൽ ഞാൻ എന്നേ തട്ടിപ്പോകുമായിരുന്നു.

ശശി പറഞ്ഞപോലെ ആ കരുതൽ സീമയിൽ നിന്ന് ഇല്ലായിരുന്നെങ്കിൽ ഒരുപക്ഷേ, അത്രമാത്രം ധൈര്യത്തോടെ ജീവിതത്തെ മുന്നോട്ട് കൊണ്ടുപോകാൻ ശശിക്ക് കഴിയില്ലായിരുന്നു. ഒരാളിൽനിന്ന് ഭാര്യയുടെയും അമ്മയുടെയും സ്നേഹവും പരിചരണവും ശാസനയും ഒന്നിച്ചുലഭിച്ച ആ അസുഖകാലത്തു തന്നെയാകും ഐ.വി. ശശി എന്ന മനുഷ്യൻ തന്റെ ജീവിതത്തെക്കുറിച്ച് കൂടുതൽ ചിന്തിച്ചത്. അതുവരെ അയാളുടെ മനസ്സിൽ സിനിമ മാത്രമായിരുന്നു. വലിയൊരു കാൻവാസിൽ വരച്ച മനോഹരമായ ഒരു ചിത്രമായിരുന്നു ശശിയുടെ ജീവിതം. പക്ഷേ, അതിൽ ജീവിതത്തിന്റെ ചതുപ്പുകളും ആഹ്ലാദങ്ങളും നീറ്റലുകളും ഉണങ്ങാത്ത മുറിവുകളും എല്ലാമുണ്ടായിരുന്നു.

ശശിയും ഞാനും തമ്മിലുള്ള ആദ്യത്തെയും അവസാനത്തെയും കണ്ടുമുട്ടലുകൾ ഒരേസമയം മനസ്സിൽ സന്തോഷവും വേദനയും പടർത്തുന്നു. തങ്കപ്പൻ മാസ്റ്ററുടെ അസിസ്റ്റന്റായി നൃത്തരംഗത്ത് ഞാൻ സജീവമായിരുന്ന കാലം. ആൾവാർപേട്ടിലെ എന്റെ കുടുംബ വീടിനടുത്തുള്ള സാമാ ലോഡ്ജിലായിരുന്നു സിനിമയിൽ ഭാഗ്യപരീക്ഷണത്തിനിറങ്ങിയ ശശിയുടെ അക്കാലത്തെ താമസം. പരിചയം വൈകാതെ അടുത്ത സൗഹൃദമായി വളർന്നു. ശശിയുടെ റൂമിൽ ഞാനും എന്റെ വീട്ടിൽ ശശിയും വരുന്നത് പതിവായി മാറി.