കാഴ്ചയുടെ ഉത്സവം

എഴുത്തിലെ കാഴ്ചകൾ മനോഹരമായി ദൃശ്യവത്ക്കരിക്കാൻ ഐ.വി. ശശിക്കായി. ആ വളർച്ച അദ്ഭുതാദരങ്ങളോടെയാണ് ഞാൻ കണ്ടുനിന്നത്

- ഹരിഹരൻ

ഐ .വി. ശശിയെക്കുറിച്ച് എഴുതുമ്പോൾ എവിടെ തുടങ്ങണം എന്ന ചോദ്യം ഞാൻ എന്നോട് തന്നെ ചോദിച്ചുകൊണ്ടിരിക്കുന്നു. ശശിയും ഞാനും ആദ്യം കണ്ടു മുട്ടിയത് എന്ന പതിവു രീതിയിൽ നിന്ന് ആരംഭിക്കണോ? ടൈറ്റിൽ കാർഡിൽ ഐ. വി. ശശി എന്ന പേര് ആദ്യമായി തെളിഞ്ഞ നിമിഷത്തിൽ നിന്ന് തുടങ്ങണോ, മലയാളസിനിമയെ അത്ഭുതപ്പെടുത്തിക്കൊണ്ട് പ്രതിഭാധരരായ എഴുത്തുകാർക്കൊപ്പം സിനിമകൾ ചെയ്ത ശശികാലത്തിൽ തുടക്കമിടണോ? ഒരു തുടക്കത്തിനുവേണ്ടി അങ്ങനെ പല സന്ദർഭങ്ങളും എന്റെ മനസ്സിലൂടെ കടന്നുപോകുന്നു. പക്ഷേ, ഒന്നുറപ്പി ച്ചു പറയാൻ കഴിയും. ശശിയുമായു ള്ള സൗഹൃദത്തിൽ ഒന്നും ഞാൻ മറന്നിട്ടില്ല. സിനിമയിലെന്നപോലെ ഓരോ രംഗങ്ങളും ഇന്നും മനസ്സിൽ മങ്ങാതെ നിൽക്കുന്നുണ്ട്. എങ്കിലും  ഞങ്ങൾ രണ്ടുപേരും കോഴിക്കോട്ടു കാരായതുകൊണ്ടും സിനിമയിൽ ഭാഗ്യപരീക്ഷണത്തിനായി കോഴിക്കോട്ട് നിന്നും വണ്ടി കയറിയവരായതു കൊണ്ടും തുടക്കം കോഴിക്കോട്ടു നിന്നു തന്നെയാവാം. യൂണിവേഴ്സൽ ആർട്സിൽ ചിത്രകല പഠിക്കാൻ വന്ന ശശിയെ ആദ്യമായി കണ്ട ഓർമ്മ ഇപ്പോഴുമുണ്ട്. ചിത്രകലാ വിദ്യാർത്ഥിയായി അന്ന് ഞാനും അവിടെയുണ്ട്. മലബാർ ക്രിസ്ത്യൻ കോളേജിൽ പഠിക്കുമ്പോൾ തന്നെയാണ് ശശി ചിത്രകല പഠിക്കാനായി യൂണിവേഴ്സൽ ആർട്സിൽ എത്തുന്നത്. ഒരർത്ഥത്തിൽ ഞങ്ങളുടെ സിനിമാസ്വപ്നങ്ങൾക്ക് ചിറക് മുളയ്ക്കുന്നത് ഈ ചിത്രകലാവിദ്യാലയത്തിൽ നിന്നാണെന്ന് പറയാം.