സിനിമാ തറവാട്ടിലെ കാരണവർക്കൊപ്പം മുതൽ പേരക്കുട്ടിക്കൊപ്പം വരെ

എം. എ. നിഷാദ് വെള്ളിത്തിരയുടെ ഭാഗമായിട്ട് 25 വർഷത്തിലേറെയായി. നാളിതുവരെ സാമൂഹ്യപ്രതിബദ്ധതയുള്ള സിനിമകളാണ് അദ്ദേഹം ചെയ്തിട്ടുള്ളത്. മലയാള സിനിമയിലെ കാരണവർ മധു സാർ മുതൽ ഇന്നത്തെ തലമുറയിലെ ധ്യാൻ ശ്രീനിവാസൻ വരെ അദ്ദേഹത്തിന്റെ സിനിമയുടെ ഭാഗമായി. നിർമാതാവ്, സംവിധായകൻ, അഭിനേതാവ് എന്നീ നിലകളിൽ തിളങ്ങുന്ന ആളാണ് എം എ. നിഷാദ്. അദ്ദേഹത്തിന്റെ ജീവിതത്തിലെ ഏറ്റവും വലിയ സ്വപ്നം മോഹൻലാലിനെ വച്ചൊരു സിനിമ എന്നതാണ്. അതിനു മുമ്പ് ഒരു സൂപ്പർ ഹിറ്റ് സിനിമ ചെയ്യണം. അതിനായാണ് ഇപ്പോൾ അയ്യർ ഇൻ അറേബ്യ എന്ന സിനിമയുമായി അദ്ദേഹം പ്രേക്ഷകരിലേക്കെത്തുന്നത്. ഒരു നീണ്ട ഇടവേളക്കു ശേഷം മുകേഷും ഉർവശിയും ഒന്നിക്കുന്ന ഒരു മുഴുനീള കോമഡി എന്റർടൈനർ ചിത്രമാണിത്. തന്റെ പുതിയ സിനിമാ വിശേഷങ്ങൾ എം.എ. നിഷാദ് വെള്ളിനക്ഷത്രത്തോട് പങ്കുവയ്ക്കുന്നു...

അയ്യർ ഇൻ അറേബ്യ എന്താണ്?

തിരുവനന്തപുരത്തെ ഏജീസ് ഓഫീസിൽ നിന്നും വോളണ്ടറി റിട്ടയർമെന്റ് എടുത്ത ആളാണ് അയ്യർ. ശ്രീനിവാസ അയ്യർ എന്നതാണ് മുഴുവൻ പേര്. മുകേ ഷാണ് ആ കഥാപാത്രം ചെയ്യുന്നത്. അദ്ദേഹത്തിന്റെ ഭാര്യയാണ് ഝാൻസി റാണി. ഊർവശിയാണ് ആ കഥാപാത്രം ചെയ്യുന്നത്. ഇരുവരും പ്രണയിച്ചാണ് വിവാഹം കഴിച്ചത്. ഇവർക്കൊരു മകനുണ്ട്, രാഹുൽ എന്നാണ് പേര്. ധ്യാൻ ശ്രീനിവാസനാണ് മകനായി അഭിനയിക്കുന്നത്. റിട്ടയർമെന്റ് എടുത്ത ശേഷം അയ്യർക്ക് ഒരുപാട് പ്രതീക്ഷകളുണ്ട്. അതായത് 2014നു ശേഷം ഇന്ത്യ തിളങ്ങുമെന്നും വളരെയേറെ പ്രത്യേകതകൾ ഉണ്ടാകുമെന്നും അദ്ദേഹം കരുതുന്നു. അതായത് അപ്പോഴുണ്ടായിരിക്കുന്ന എല്ലാ കാര്യങ്ങൾക്കും ഒരു വ്യത്യാസമുണ്ടാകുമെന്നും അദ്ദേഹം വിശ്വസിക്കുന്നു. ഇന്ത്യൻ സംസ്കാരമാണ് ഏറ്റവും വലുത് എന്ന് വിശ്വസിക്കുന്ന വ്യക്തി കൂടിയാണ് അയ്യർ. വോളണ്ടറി റിട്ടയർമെന്റിനു ശേഷം ശുദ്ധ ബ്രാഹ്മണനായി ജീവിക്കണമെന്ന് അദ്ദേഹം ആഗ്രഹിക്കുന്നു. അതിനിടയിൽ മകൻ രാഹുൽ പ്രത്യേക സാഹചര്യത്തിൽ ദുബായിലേക്കു പോകുന്നു. അയ്യർക്കും ഭാര്യക്കും മകന്റെ അടുത്തേക്ക് പോകേണ്ടി വരും. അങ്ങനെ അയ്യർ അറേബ്യയിലെത്തുമ്പോൾ ഉണ്ടാകുന്ന രസകരമായ സംഭവങ്ങളാണ് അയ്യർ ഇൻ അറേബ്യ എന്ന എന്റെ സിനിമ പറയുന്നത്.

കുടുംബ ചിത്രങ്ങളുടെ വിഭാഗത്തിൽ ഈ സിനിമയെപെടുത്താമോ? ഇത് കാണുമ്പോൾ ആക്ഷേപ ഹാസ്യത്തിന്റെ കഥയായി തോന്നാം. പക്ഷേ അയ്യർ ഇൻ അറേബ്യ എന്ന സിനിമ ഒരു ഫാമിലി സറ്റയറാണ്. കഥയും തിരക്കഥയും സംഭാഷണവും ഞാൻ തന്നെയാണ് എഴുതിയിരിക്കുന്നത്. കഥ എഴുതുമ്പോൾ തന്നെ അയ്യരുടെ കഥാപാത്രമായി എന്റെ മനസിൽ മുകേഷേട്ടന്റെ മുഖമാണ് തെളിഞ്ഞത്. ഹ്യൂമർ നന്നായി ചെയ്യാൻ സാധിക്കുന്നത് മുകേഷേട്ടനാണ്. ഹാസ്യം നന്നായി വർക്കൗട്ട് ചെയ്യേണ്ട സിനിമ കൂടിയാണിത്. അതിനാലാണ് മുകേഷേട്ടനെ തന്നെ തീരുമാനിച്ചത്.