ബ്രീഡിങ് വഴിയും വരുമാനം

വയനാട്ടിലെ ഹൈടെക് പന്നി പ്രജനനകേന്ദ്രം

ഇറച്ചിവിപണിക്കായി വളർത്തുന്നതിനൊപ്പം ഗുണമേന്മയുള്ള പന്നിക്കുഞ്ഞുങ്ങളെ ഉൽപാദിപ്പിച്ചു വിൽക്കുന്നതും പന്നിവളർത്തലിലെ ലാഭവഴിയാണ്. എന്നാൽ കുഞ്ഞുങ്ങൾക്കു 10 മാസംകൊണ്ട് നിശ്ചിത വളർച്ച ഉണ്ടായാൽ മാത്രമേ കർഷകർക്കു പന്നി വളർത്തൽ ആദായകരമാകൂ. വംശഗുണമുള്ള മാതാപിതാക്കളിൽ നിന്ന് ശാസ്ത്രീയ പ്രജനനത്തിലൂടെ, ആരോഗ്യകരമായ സാഹചര്യത്തിൽ ഉൽപാദിപ്പിക്കുന്ന കുഞ്ഞുങ്ങൾക്ക് ഇതേ പോലെ മികച്ച വളർച്ചയും ആരോഗ്യവുമുണ്ടാകുകയുള്ളൂ.

ഇങ്ങനെ ജനിക്കുന്ന പന്നിക്കുഞ്ഞുങ്ങൾക്ക് ഇന്നു വിപണിയിൽ മികച്ച ഡിമാൻഡുണ്ട് എന്നു പറയുന്നു വയനാട്തവിഞ്ഞാൽ കിഴക്കോട്ടൂരുള്ള എ വൺ ബ്രീഡിങ് ഫാം ഉടമ ഷാജി കപ്പലുമാക്കൽ.ഇറച്ചിയാവശ്യത്തിനായി നാനൂറോളം പന്നികളെ വളർത്തുന്ന ഷാജി, സുഹൃത്തും വിരമിച്ച പൊലീസ് ഉദ്യോഗസ്ഥനുമായ ജോർജ് തോമസുമായി ചേർന്ന് 2018ൽ ഹൈ ടെക് സൗകര്യമുള്ള ബ്രീഡിങ് ഫാം കൂടി തുടങ്ങിയത് ഈ ഡിമാൻഡ് തിരിച്ചറിഞ്ഞു തന്നെ.

വിവിധ ഘട്ടങ്ങളിലുള്ള100 തള്ള പന്നികൾക്ക് പാർക്കാനും പ്രസവിക്കാനും അവയുടെ കുഞ്ഞുങ്ങളെ രണ്ടുമാസം പരിപാലിക്കാനും സൗകര്യത്തിൽ 5500 ചതുരശ്രയടി വിസ്തൃതി വരുന്ന ഹൈടെക് ബീഡിങ് ഫാം ആണ് കിഴക്കോട്ടൂരിലെ സ്വന്തം കൃഷിയിടത്തിൽ ഷാജി നിർമിച്ചിരിക്കുന്നത്.

ലാഭക്കൂട്

പ്രസവിച്ചു കിടക്കുന്ന ഓരോ തള്ളപ്പന്നിക്കും അതിന്റെ കുഞ്ഞുങ്ങൾക്കുമായി പ്രത്യേകം കാബിനുകൾ. ഓരോ കാബിനിലും തള്ളപ്പന്നിയെ ഒതുക്കി നിർത്താനുള്ള കമ്പിയഴിക്കൂടുകൾ. ഈ രീതിയിൽ 20 പന്നികൾക്ക് ഒരേസമയം പ്രസവിച്ചു കിടക്കാനുള്ള കാബിനുകളുണ്ട് ഫാമിൽ. 1.80 മീറ്റർ വീതിയും 2.40 മീറ്റർ നീളവുമുള്ളതാണ് ഓരോ കാബിനും. ഇതിനുള്ളിൽ 60 സെ.മീറ്റർ മാത്രം നീളവും 2 മീറ്റർ വീതിയുമുള്ള കമ്പിയഴിക്കൂടിനുള്ളിലാണ് തള്ള പന്നി കഴിയുന്നത് (ചിത്രം കാണുക).