തമാശയല്ല താമരക്കൃഷി

ഇതര സംസ്ഥാന വിപണികൾ ലക്ഷ്യമിട്ട് ഇരുപതിലേറെ ഏക്കറിൽ താമരക്കൃഷി ചെയ്യുന്ന മൂവർ സംഘം

- ജോബി ജോസഫ് തോട്ടുങ്കൽ

കുറെക്കാലം മുൻപാണ്. വാഹന വർക്ഷോപ്പിൽ മെക്കാനിക്കായി ജോലിചെയ്യുന്നു. തുച്ഛമായ വേതനം. കുറെക്കൂടി നല്ല വരുമാനം ഉറപ്പാക്കാൻ മറ്റെന്തെങ്കിലും വഴിയുണ്ടാ എന്നു തിരയുന്ന കാലം. അന്നൊരിക്കൽ ഗുരുവായൂരിലെത്തി കണ്ണനു മുന്നിൽ മനസ്സുരുകി പ്രാർഥിച്ചു. തൊഴുതിറങ്ങുമ്പോൾ വടക്കേനടയിൽ നിന്നൊരു താമരയിതൾ കയ്യിലെത്തി. അതൊരു കൃഷിസന്ദേശമാണെന്നു മനസ്സു പറഞ്ഞു. അന്ന് എടപ്പാൾ പ്രദേശത്താരും താമരയൊരു കൃഷിയിനമായി കണ്ടിട്ടില്ല. എന്നാൽ 10 -15 കിലോമീറ്റർ വടക്കു മാറി, മലപ്പുറം ജില്ലയിൽ തന്നെ തിരുനാവായ ഭാഗത്ത് വലിയ തോതിൽ കൃഷിയുണ്ട്. അവിടെ നിന്നു നടീൽ വസ്തു കിട്ടുമോ എന്നന്വേഷിച്ചു. അവർ പക്ഷേ താമരവള്ളിക്കു ചോദിച്ചത് താങ്ങാനാവാത്ത വില. എന്തു ചെയ്യണം എന്നറിയാതെ ഏതാനും മാസങ്ങൾ...'' ഇളവെയിലേറ്റു തുടുത്ത പൂമൊട്ടുകൾ നിറഞ്ഞ താമരക്കായലിലേക്കു നോക്കി നിന്ന് ഇന്നത്തെ ലാഭകൃഷിയുടെ അന്നത്തെ അനിശ്ചിതത്വം സുധാകരൻ ഓർത്തെടുത്തു.

വൈകാതെ തിരുനാവായയിലെ കൃഷിക്കാർ എടപ്പാളിലും വിശാലമായൊരു കോൾപ്പാടത്തിന്റെ പാതി പാട്ടത്തിനെടുത്ത് താമരകൃഷി തുടങ്ങി. രണ്ടു കൊല്ലത്തിനകം ബാക്കി പകുതിയിലേക്കും തമരവള്ളികൾ തലനീട്ടി തുടങ്ങി. കാത്തുനിൽക്കാതെ, താമരവള്ളികൾ പടർന്നു കയറിയ ബാക്കി പകുതി പാട്ടത്തിനെടുത്തു കൃഷിക്കിറങ്ങി സുധാകരനും സുരേഷും സുദർശനനും ചേർന്ന മൂവർസംഘം. ഇന്ന് ഇരുപത്തഞ്ചോളം ഏക്കർ വരും ഇവരുടെ താമരക്കൃഷി. 12,000 പൂക്കൾ വരെ ഒറ്റ ദിവസം വിളവെടുത്ത അനുഭവമുണ്ടെന്നു സുധാകരൻ. വിപണിയും വിശാലമായി. ഉൽപാദിപ്പിക്കുന്ന പുക്കളിൽ നല്ല പങ്കും വിൽക്കുന്നത്, വടക്കേ ഇന്ത്യൻ സംസ്ഥാനങ്ങളിലും വടക്ക്-കിഴക്കൻ സംസ്ഥാനങ്ങളിലും. വിശേഷാവസരങ്ങളിൽ പൂവൊന്നിന്10-12രൂപവരെ വില ഉയരും.അതല്ലെങ്കിൽ 5-7 രൂപ.

കൃഷിയിടം