മനുവിന്റെ ഗൗരാമിക്കുഞ്ഞുങ്ങൾ

 ഇരുപത്തഞ്ചിലധികം കുളങ്ങളിൽ ഉൽപാദനം

- ഐബിൻ ജോസഫ് കാണ്ടാവനം

ആറുമാസംകൊണ്ട് അരകിലോയെങ്കിലും വളരുന്ന മത്സ്യമാണ് എല്ലാവർക്കും വേണ്ടത്. കുറഞ്ഞത് കാൽ കിലോ തൂക്കമെത്തിയാൽ പലർക്കും തൃപ്തിയായി. തിലാപ്പിയയും നട്ടറും വാളയുമൊക്കെ വാഴുന്ന ഈ നാട്ടിലാണ് ഒരു വർഷം കൊണ്ട് അര കിലോയെങ്കിലും വളരാൻ ആയാസപ്പെടുന്ന ഗൗരാമിക്കായി ഇരുപത്തഞ്ചിലധികം കുളങ്ങൾ തീർത്തിരിക്കുന്നത്. കോട്ടയം ജില്ലയിലെ പുഞ്ഞാറിൽ കര്യാപുരയിടം മനുവിന്റേതാണ് ഈ സംരംഭം. മീനല്ല, മീൻകുഞ്ഞുങ്ങളാണ് ഇവിടെ പ്രധാന ഉൽപനം. ഓരോ കുളത്തിലും മാതൃ പിതൃ മത്സ്യങ്ങളുണ്ടാകും. അവ കൂടു കൂട്ടി വിരിയിക്കുന്ന കുഞ്ഞുങ്ങൾക്കായി സംസ്ഥാനത്തിന്റെ വിവിധ ഭാഗങ്ങളിൽ നിന്ന് ആവശ്യക്കാർ മനുവിന്റെ വീട്ടിലെത്തുന്നു.

മൂന്നു പതിറ്റാണ്ട്

തൊണ്ണൂറുകളുടെ തുടക്കത്തിലാണ് കര്യാപുരയിടം വീട്ടിലേക്ക് ജയന്റ് ഗൗരാമികളെത്തുന്നത്. പത്രത്തിൽ പരസ്യം കണ്ട് ഒരു കുഞ്ഞിന് 25 രൂപ നൽകി വാങ്ങിക്കൊണ്ടുവന്ന് വീട്ടിലെ കുളത്തിൽ നിക്ഷേപിക്കുകയായിരു ന്നു. ചേമ്പിലയും ചീരയുമൊക്കെ കഴിച്ച് അവ വളർന്നു. 4 വർഷം പിന്നിട്ടപ്പോൾ കുളത്തിൽ കുഞ്ഞുങ്ങളെ കണ്ടുതുടങ്ങിയപ്പോഴാണ് ഇവ സ്വയമേ കുഞ്ഞുങ്ങളെ ഉൽപാദിപ്പിക്കുമെന്ന് അറിഞ്ഞത്. അന്ന് വിപണിയിൽ ഏറ്റവും പ്രചാരത്തിലുണ്ടായിരുന്നത് കാർപ്പ് മത്സ്യങ്ങളായിരുന്നു. ഹോർമോൺ കുത്തിവച്ചാണ് അവയുടെ പ്രത്യുൽപാദനം. തനിയെ കുഞ്ഞുങ്ങൾ ഉണ്ടാകുമെന്ന് തിരിച്ചറിഞ്ഞതോടെ കൂടുതൽ പഠിച്ചു. ക്രമേണ ചെറിയ രീതിയിൽ വിൽപനയും തുടങ്ങി.