കുരുമുളകിന് വില ഉയർന്നേക്കും

ഉൽപാദനം കഴിഞ്ഞ സീസണെ അപേക്ഷിച്ച് 20% കണ്ടുകുറയുമെന്ന് വിലയിരുത്തൽ

- കെ.ബി. ഉദയഭാനു ഇ-മെയിൽ: [e-mail]

ഹൈറേഞ്ചിലെ കുരുമുളകുതോട്ടങ്ങളിൽ മുളകുമണികൾ മൂത്ത് വിളയുന്നു. കാലാവസ്ഥ മാറ്റം കൊടികളെ സ്വാധീനിച്ചതു കണക്കിലെടുത്താൽ ഈ മാസം രണ്ടാം പകുതിയിൽ ചെറിയ തോതിൽ വിളവെടുപ്പു തുടങ്ങാമെന്ന നിഗമനത്തിലാണ് പലരും. പുതുവർഷാരംഭത്തിൽ അടിമാലിമുളക് വിപണിയിൽ ഇടം പിടിക്കുമെന്ന പ്രതീക്ഷയിലാണ് വ്യാപാരരംഗം. ഫെബ്രുവരി-മാർച്ചിൽ എല്ലാ ഭാഗങ്ങളിലും വിളവെടുപ്പ് ഊർജിതമാകും.

വിപണിവൃത്തങ്ങൾ വിളവെടുപ്പ് വിശേഷങ്ങൾക്കായി കാതോർക്കുന്നു. ഉൽപാദനം സംബന്ധിച്ച് ഔദ്യോഗിക വിലയിരുത്തൽ ഇനിയും വന്നിട്ടില്ല. പൈസസ് ബോർഡിൽ നിന്നു വ്യക്തമായ കണക്കുകൾ വന്നാൽ അതിന് അനുസൃതമായി സീസൺ ആരംഭത്തിൽ മുളക് വിപണിയിറക്കണമോ, അതോ കരുതൽ ശേഖരത്തിലേക്കു നീക്കണമോയെന്ന കാര്യത്തിൽ തീരുമാനത്തിലെത്താൻ കർഷകർക്കു കഴിയുമായിരുന്നു. നിർഭാഗ്യകരമെന്നു പറയട്ടെ, കാർഷികമേഖലയുടെ ഈ ചെറിയ ആവശ്യം പോലും കേന്ദ്ര ഏജൻസിക്ക് യഥാസമയം കൃത്യതയോടെ നിവൃത്തിക്കാനാവുന്നില്ല. ഇറക്കുമതിയുടെ കൃത്യമായ കണക്കും ശേഖരിച്ച് ഉൽപാദകരെ അറിയിക്കേണ്ട ബാധ്യതയും അവർ നിറവേറ്റുന്നില്ല.