പതിനാറായിരം നിക്ഷേപിച്ചു കിട്ടിയത് മൂന്നു ലക്ഷം

പാഷൻ ഫ്രൂട്ട് കുറഞ്ഞ മുതൽമുടക്കിൽ ഉയർന്ന വരുമാനം

ഇരുപതിനായിരം രൂപയുടെ പന്തൽ, സ്വന്തം അധ്വാനം, 11കെവി വൈദ്യുതിലൈനിനു കീഴിൽ തരിശുകിടന്ന പറമ്പിൽനിന്ന് ആഴ്ച തോറും 18,000-20,000 രൂപയുടെ വരുമാനം കണ്ടെത്താൻ ജിന്റോയ്ക്ക് ഇത്രയേ വേണ്ടിവന്നുള്ളൂ. കുറഞ്ഞ ചെലവിൽ അതിവേഗം വരുമാനം കണ്ടെത്താൻ പാഷൻ ഫ്രൂട്ടിനുള്ള സാധ്യത ഒരിക്കൽ കൂടി ഉറപ്പിക്കുകയാണ് എഴുകുംവയൽ തയ്യിൽ ജിന്റോയുടെ അനുഭവം. 3 സീസണുകളിലായി 6-7 മാസത്തോളം ഉൽപാദനം കിട്ടുമെന്നതും ഈ നേട്ടത്തിന്റെ തിളക്കം വർധിപ്പിക്കുന്നു.

ഏതൊരു പഴവർഗത്തെക്കാളും കുറഞ്ഞ മുതൽമുടക്കിൽ കൃഷി ചെയ്യാമെന്നതാണ് പാഷൻ ഫ്രൂട്ടിന്റെ മെച്ചമെന്ന് ജിന്റോ ചൂണ്ടിക്കാട്ടി. സ്വന്തം അധ്വാനത്തിൽ പന്തിലിട്ടതിനാൽ കമ്പി വാങ്ങാനും മറ്റും മാത്രമേ പണം മുടക്കേണ്ടി വന്നുള്ളൂ. ഒന്നരയേക്കറോളം സ്ഥലത്ത് പന്തലിടാൻ 150 കിലോ കമ്പി വാങ്ങേണ്ടി വന്നു. കിലോയ്ക്ക് 110 രൂപ നിരക്കിൽ 16, 500 രൂപ ചെലവായി. പന്തലിനു കാല് നാട്ടാൻ സ്വന്തം പറമ്പിലെ മുള ഉപയോഗിച്ചതിനാൽ പണച്ചെലവുണ്ടായില്ല.