ഒന്നിച്ച് ചെയ്യാം വീട്ടുകാര്യങ്ങൾ

വീട്ടുഭരണത്തിന്റെ പുതിയ ‘വെല്ലുവിളികൾ' നേരിടാനുള്ള കെൽപ് പുതിയ തലമുറ ഉണ്ടാക്കിയെടുക്കണം. ചുമതലകൾ കൃത്യമായി പകുത്തുനൽകി ഒരുമിച്ചു നീങ്ങുന്നതാണ് നല്ലത്

- ഡോ.അദിതി എൻ. റിട്ട.അസോസിയേറ്റ്പ്രൊഫസർ മനഃശാസ്ത്രവിഭാഗം എം.ജി.ദകാളേജ്, തിരുവനന്തപുരം

അവസാനം, ലിംഗപരമായ വ്യത്യാസങ്ങളും വേർതിരിവുകളും മറന്ന് ജീവിക്കാൻ കഴിയുന്ന കാലം വന്നു. ആൺ-പെൺ ഭേദമില്ലാതെ കൊറോണ എല്ലാവരെയും അടച്ച് അകത്തിരുത്തി. അണുകുടുംബങ്ങളിൽ കുടുംബഭരണത്തിൽ സ്ത്രീയ്ക്കും പുരുഷനും തുല്യ ഇടപെടലുകൾ ആവശ്യമാകുന്ന ചുറ്റുപാടുകൾ വന്നുകൊണ്ടിരിക്കുന്നു.

വീട്ടുഭരണത്തിന്റെ പുതിയ വെല്ലുവിളികൾ നേരിടാനുള്ള കെൽപ് പുതിയ തലമുറയ്ക്ക് ഉണ്ടാക്കിയെടുക്കുക തന്നെ വേണം. കാരണം, ആൺ-പെൺ വ്യത്യാസങ്ങൾ അത്യധികമായി പ്രകടമായിരുന്ന ഒരു മേഖലയാണ് ഇത്. ഗൃഹഭരണത്തിന്റെ അടിസ്ഥാനസിദ്ധികൾ ആണിലും പെണ്ണിലും തുല്യമായും സ്വാഭാവികമായും വീതിക്കപ്പെട്ടു കിടക്കുന്നു. എന്നാൽ അത് പൂർണതയിലെത്താൻ അവർക്ക് അതതു പ്രായത്തിൽ, ഘട്ടങ്ങളിൽ, ശരിയായ പരിശീലനങ്ങൾ വേണം. വീട്ടകങ്ങളും വിദ്യാലയങ്ങളും സമൂഹവും ഈ ചുമതലകൾ പഠിപ്പിച്ചു കൊടുക്കാനുള്ള പരിശീലന കളരികൾ ആണെന്ന കാര്യം തിരക്കുകൾക്കിടയിൽ വിസ്മരിക്കപ്പെട്ടുപോകുന്നു. അതിന്റെ അപാകങ്ങൾ ചുറ്റിലും നാം കാണുന്നുമുണ്ട്.

ഒരേസമയത്ത് ഒന്നിലേറെ കാര്യങ്ങളിൽ മനസ്സ് വ്യാപരിപ്പിക്കാനുള്ള പ്രത്യേക കഴിവ് ഗൃഹഭരണത്തിൽ അത്യന്താപേക്ഷിതമാണ്. ഓഫീസിൽ തിരക്കിട്ട് ഫയലുകൾ നോക്കുമ്പോഴും സ്കൂളിൽ നിന്ന് മക്കൾ സുരക്ഷിതരായി മടങ്ങിയെത്തി ഭക്ഷണം കഴിച്ചോ, ട്യൂഷൻ ക്ലാസ്സിന് പോയോ, വീട് ശരിക്ക് പൂട്ടിയോ എന്നൊക്കെ ചുറുചുറുക്കോടെ അന്വേഷിക്കാൻ കഴിയണമെങ്കിൽ ശ്രദ്ധ ഒരേ സമയത്ത് പലതിലായി പങ്കിടുന്ന സിദ്ധി സ്വായത്തമാക്കിയേ പറ്റൂ.