വൈദ്യശാസ്ത്രത്തിൽ വരാനിരിക്കുന്നത്

കോവിഡിനെ തുടർന്ന് വൈദ്യശാസ്ത്ര ഗവേഷണ മേഖലയിലേക്ക് വന്ന വൻ മുതൽമുടക്കും ആർട്ടിഫിഷ്യൽ ഇന്റലിജൻസ്, റോബോട്ടിക്സ്, മെറ്റീരിയൽ സയൻസ് തുടങ്ങിയ നൂതന സാങ്കേതിക മേഖലകളിലുള്ള മുന്നേറ്റവും വൈദ്യശാസ്ത്രത്തിന്റെ കുതിപ്പിന് വേഗം കൂട്ടിയിട്ടുണ്ട്. വരുംവർഷങ്ങളിൽ അദ്ഭുത കരമായ പല സാങ്കേതിക കുതിച്ചുചാട്ടങ്ങളും പ്രതീക്ഷിക്കാം

- ഡോ.അരുൺമംഗലത്ത് ജിപ്ലാൻഡ്ഹെൽത്ത്സർവീസ് രജിസ്ട്രാർ ഓസ്ട്രേലിയ

മെഡിക്കൽ സാങ്കേതികവിദ്യ അതിവേഗം വികാസം പ്രാപിച്ച ഏതാനും വർഷങ്ങളാണ് കടന്നുപോയത്. കോവിഡിനെ തുടർന്ന് വൈദ്യശാസ്ത്ര ഗവേഷണ മേഖലയിലേക്ക് വന്ന വൻ മുതൽമുടക്കും ആർട്ടിഫിഷ്യൽ ഇന്റലിജൻസ്, റോബോട്ടിക്സ്, മെറ്റീരിയൽ സയൻസ് തുടങ്ങിയ നൂതന സാങ്കേതിക മേഖലകളിലുള്ള മുന്നേറ്റവും വൈദ്യശാസ്ത്രത്തി ന്റെ കുതിപ്പിന്റെ വേഗം കൂട്ടിയി ട്ടുണ്ട്. പുതിയ ചികിത്സകൾ, മെഡിക്കൽ ഉപകരണങ്ങൾ, മരുന്നുകൾ, പരിശോധനകൾ എന്നിവ വികസിപ്പിക്കാൻ വരുംവർഷങ്ങളിൽ ഗവേഷകരെ സഹായിക്കുന്ന അനേകം മുന്നേറ്റങ്ങളാണ് 2022-ലും ഉണ്ടായത്. ഇത്തരം മുന്നേറ്റങ്ങളും അവ വരുംവർഷങ്ങളിൽ വൈദ്യശാസ്ത്രത്തെ എങ്ങനെ രൂപപ്പെടുത്തുമെന്നും നോക്കാം.

പുതിയ mRNA വാക്സിനുകൾ

കഴിഞ്ഞ കുറച്ച് വർഷങ്ങളായി എം.ആർ.എൻ.എ.(mRNA) സാങ്കേതികവിദ്യയിലും വാക്സിനുകളിലും മുൻപില്ലാത്തവിധം ഗവേഷകശ്രദ്ധ പതിഞ്ഞിരുന്നു. ഫലപ്രദമായ കോവിഡ് വാക്സിനുകളുടെ വികസനത്തിലും ഈ സാങ്കേതികവിദ്യ വ്യാപകമായി ഉപയോഗിക്കപ്പെട്ടു. ലോകത്താദ്യമായി ഈ സാങ്കേതികവിദ്യ ഉപയോഗിച്ച് വികസിപ്പിച്ച വാക്സിനുകൾ കോവിഡിനെതിരേയാണ് ഉപയോഗിച്ചത്. മറ്റ് സാങ്കേതിക വിദ്യകളോട് താരതമ്യം ചെയ്താൽ പല മേന്മകളും mRNA സാങ്കേതികവിദ്യയ്ക്കുണ്ട്. അതുകൊണ്ട് മറ്റുരോഗങ്ങൾക്ക് ഫലപ്രദമായ ചികിത്സാരീതികൾ കണ്ടെത്താൻ ഈ സാങ്കേതികവിദ്യ ഉപയോഗിക്കാമോ എന്ന ഗവേഷണത്തിലാണ് പല ലാബുകളും.

എം.ആർ.എൻ.എ. എച്ച്.ഐ.വി. വാക്സിനുകൾക്കായി അമേരിക്കയിലെ നാഷണൽ ഇൻസ്റ്റിറ്റ്യൂട്ട് ഓഫ് ഹെൽത്ത് ഇതിനകം മൂന്ന് വ്യത്യസ്ത പരീക്ഷണങ്ങൾ ആരംഭിച്ചിട്ടുണ്ട്. ഈ രോഗത്തിനെതിരേ ഇതുവരെ വാക്സിനുകൾ വികസിപ്പിക്കാനുള്ള ശ്രമങ്ങളൊന്നും വിജയം കണ്ടിരുന്നില്ല. എന്നാൽ പുതിയ സാങ്കേതികവിദ്യ വിജയസാധ്യത വർധിപ്പിക്കുന്നു എന്നാണ് ഗവേഷകർ കരുതുന്നത്. ഇതേ സാങ്കേതികവിദ്യ ഉപയോഗിച്ച് ഫ്ലൂ (ഇൻഫ്ലുവൻസ തടയാനുള്ള വാക്സിനുകളും ഗവേഷണത്തിന്റെ വിവിധ ഘട്ടങ്ങളിലാണ്. പലവിധ കാൻസറുകൾക്കെതിരേ പ്രതിരോധവ്യവസ്ഥയെ തിരിച്ചുവിടാൻ സഹായിക്കുന്ന തരം കുത്തിവയ്പുകളും ഒരുപക്ഷേ, സമീപഭാവിയിൽ ഈ സാങ്കേതികവിദ്യ ഉപയോഗിച്ച് വികസിപ്പിക്കാൻ സാധ്യതയുണ്ടെന്ന് വിദഗ്ധർ പ്രവചിക്കുന്നു. പാൻക്രിയാറ്റിക് കാൻസർ, കോളൻ കാൻസർ, മെലനോമ എന്നിവയ്ക്കെതിരേയൊക്കെയുള്ള വാക്സിനുകൾ ഗവേഷണത്തിന്റെ വിവിധ ഘട്ടങ്ങളിലാണ്.