നിർമിത ബുദ്ധി രോഗനിർണയം മുതൽ ചികിത്സവരെ

ആർട്ടിഫിഷ്യൽ ഇന്റലിജൻസിന്റെയും മറ്റ് ആധുനിക സാങ്കേതിക വിദ്യകളുടെയും സഹായത്തോടെ ഹൃദ്രോഗ നിർണയവും ചികിത്സയും കൂടുതൽ കൃത്യതയോടെയും വേഗത്തിലും സാധ്യമാകുന്ന തരത്തിലേക്ക് മുന്നേറുകയാണ്

ഹൃദ്രോഗചികിത്സയിൽ വരാനിരിക്കുന്ന മുന്നേറ്റങ്ങൾ ഏറെയുണ്ട്. ആർട്ടിഫിഷ്യൽ ഇന്റലിജൻസ് അഥവാ നിർമിതബുദ്ധി മനുഷ്യന്റെ പരിമിതമായ കഴിവുകളെ അതിവിദഗ്ധമായി കടത്തിവെട്ടുന്നതോടെ വേഗത്തിലും കൂടുതൽ കൃത്യതയിലും രോഗപരിശോധനയും ചികിത്സയും സാധ്യമാകുന്നു. കംപ്യൂട്ടറുകളുടെ ഉപയോഗം കൂടാതെ മനുഷ്യർക്ക് ഭാവിയിൽ ജീവിക്കാൻ പറ്റില്ലെന്ന് ഇതിനകം തെളിഞ്ഞു കഴിഞ്ഞു. നിങ്ങളുടെ മൊബൈൽ ഫോൺ നഷ്ടപ്പെട്ടുവെന്നിരിക്കട്ടെ. നിങ്ങളുടെ മാനസിക വ്യവസ്ഥ തകിടം മറിയുന്നത് കാണാം. കാരണം അത് കിട്ടുന്നതു വരെ നിങ്ങളുടെ പ്രവർത്തനങ്ങൾ അക്ഷരാർഥത്തിൽ സ്തംഭിക്കും.

യുവാൻ നോവാ ഹരാരി എന്ന ഇസ്രയേലി ചരിത്രകാരൻ തന്റെ 'ഹോമോദിയൂസ് എന്ന വിഖ്യാത ഗ്രന്ഥത്തിൽ ഊന്നിപ്പറയുന്നത് ഇപ്രകാരമാണ്. ഇരുപത്തൊന്നാം നൂറ്റാ ണ്ടിലെ ശാസ്ത്രീയ ഗവേഷണ വ്യവസ്ഥയിലെ ഏറ്റവും പ്രധാനചോദ്യം അധികപ്പറ്റായ മനുഷ്യരെയെല്ലാം എന്ത് ചെയ്യുമെന്നതാണ്. എല്ലാ കാര്യങ്ങളും കൂടുതൽ മികച്ചതായി ചെയ്യാൻ പ്രാപ്തമായ ബോധമെന്നൊന്നില്ലാത്ത അൽഗോരിതങ്ങൾ (പ്രോഗ്രാം ചെയ്യപ്പെട്ട കംപ്യൂട്ടറുകൾ ഉണ്ടായിക്കഴിയുമ്പോൾ ബോധമുള്ള മനുഷ്യർ പിന്നെ എന്തുചെയ്യും?

ജീവൻ രക്ഷിക്കാൻ സ്വയം ഷോക്ക് നൽകുന്ന ഉപകരണം

 കൃത്യമല്ലാത്ത അമിതവേഗത്തിലുള്ള ഹൃദയസ്പന്ദനം (ഏട്രിയൽ ഫിബ്രിലേ ഷൻ, വെൻട്രിക്കുലർ ടാക്കികാർഡിയ) ഹാർട്ട് അറ്റാക്കിന് ശേഷമോ അല്ലാത്ത സാഹചര്യങ്ങളിലോ ഉണ്ടാകാം. ഈ സ്പന്ദനവൈകല്യം ഒരു പരിധി കഴിഞ്ഞാൽ ബോധക്ഷയമുണ്ടാകാം, മരണം തന്നെ സംഭവിക്കാം. ഈ സാഹചര്യത്തിൽ ഉടൻ ഡി.സി.ഷോക്ക് കൊടുത്ത് സ്പന്ദനവേഗം സാധാരണനിലയിലെത്തിച്ചാൽ രോഗിയുടെ ജീവൻ രക്ഷിക്കാം. രോഗിയുടെ ഗുരുതരാവസ്ഥയെ പരിഗണിച്ച് നെഞ്ചിനുള്ളിൽ ഹൃദയത്തോട് ചേർത്ത് വെച്ചുപിടിപ്പിക്കാവുന്ന ഐ.സി.ഡി. (ഇംപ്ലാന്റബിൾ കാർഡിയോവേർട്ടർ ഡിഫിബ്രിലേറ്റർ) സംവിധാനം നിലവിലുണ്ട്. അതും ഒരാളുടെ ഹൃദയ സ്പന്ദന വൈകല്യം കണ്ടുപിടിച്ച് ഉടൻ രോഗനിർണയം ചെയ്ത് സ്വയം ഷോക്കു കൊടുക്കുകയും ഹൃദയമിടിപ്പ് സാധാരണനിലയിലാക്കുകയും ചെയ്യുന്നു.