இரவின் நிழல்

வாழ்க்கையின் கடைசி அத்தியாயத்தில் இருக்கும் ஒரு மனிதன், தான் கடந்து வந்த பாதையை ரீவைண்ட் செய்து பார்ப்பதை புதிய பாணியில் சொல்லியிருக்கிறது படம்.

சந்தேக புத்தியால் மனைவியை நடத்தைக் கெட்டவள் எனக் கூறி அடித்துக் கொன்று விடுகிறான் ஒரு குடிகார கணவன். ரத்த வெள்ளத்தில் நிர்வாணமாக கிடக்கும் தன் அம்மாவின் மார்பை முட்டி பால் குடிக்கிறது ஒரு குழந்தை (நந்து). நந்துவை தத்தெடுத்து வளர்க்கும் ஒரு தம்பதி, தங்களுக்கென்று ஒரு குழந்தை பிறந்ததும், நந்துவை துரத்தி விடுகின்றனர்.

ரோட்டோரம் தூங்கி, போலீஸ்காரனின் பாலியல் இம்சைக்கு ஆளாகி, பசியின் கொடுமையால், திருநங்கை ஒருவள் இட்ட சோறுக்கு விசுவாசமாக இருக்க, சிறு வயதிலேயே கஞ்சா விற்கிறான் நந்து.

அந்த வயதில் பார்க்கக் கூடாதவற்றை எல்லாம் பார்த்து வளரும் அவன், வளரிளம் பருவத்தில் தான் ஆசைப்பட்ட பெண்ணுக்காக நகை திருடப் போய் போலீசில் மாட்டிக் கொள்கிறான். அவளும் கூட காதலன் பெயரை நெஞ்சில் பச்சை குத்தி வைக்கிறாள்.

ஜெயிலுக்கு போய் விட்டு திரும்பும் நந்து, தன் காதலி வேறொருவனுடன் படுக்கையில் இருப்பதைப் பார்த்து பதறிப் போகிறான்.

'வாழ்க்கையில் பணத்தை விட உயர்வான விஷயங்கள் நிறைய இருக்கு, ஆனா அதையும் பணத்தைக் கொண்டு தான் வாங்க முடியும்' என வசனம் பேசிச் செல்கிறாள் அவள்.

அந்த சோகத்தில் குடித்து விட்டு மயங்கும் அவன், ஆந்திராவுக்கு போய் சேர்கிறான். அங்குதான் சிலக்கம்மாவை சந்தித்து திருமணம் செய்து கொள்கிறான்.