நீ தானே என் காதல் வேகம்!

காற்றின் சிலிர்ப்பில் மலர் கொத்துகள் அசைந்து, அசைந்து மழைத் துளிகள் தூறலாய் போடும் நேரம், மார்கழி மாத காலைப் பொழுதில், பவழமல்லி இலைகளும், மல்லிகைப் பூவின் இலைகளும், அங்கிருந்த பூப்பந்தலில், ஆடி,இலையோடு இலைபடும் நேரம், குப்பென்று பூக்களின் மணம், அந்த பரந்த திண்ணையில் பரவிய சுகமான சூழலில் சுடச்சுட டிகிரி காப்பியை நுரைபொங்க, மணக்க மணக்க சாவகாசமாய் ஆற்றிசதாசிவம் குடித்தார்.

- பி.கல்யாணி

"ஆஹா பசும்பாலை வீட்டில் கரந்து குடிக்கும் காபியின் மணம் பேஷ், பேஷ் ரொம்ப அருமையாயிருக்கு.'' காலை மணி ஐந்தரை. மார்கழி மாதமானதால், கற்பகம் காலையிலேயே எழுந்து கம்பி இழைக்கோலத்தில் துளசி மாடத்தை வரைந்தாள். தெருவில் போவோருக்கெல்லாம் கோலத்தின் நடுவில் இருக்கும் பூசணிப் பூவை, ஆழ்ந்து லயித்து பார்த்துக் கொண்டே இருக்கத் தோன்றும்.

சதாசிவம், அவர் மனைவி கற்பகத்திற்கு, அப்படியொரு பதிபக்தி, குடும்பம் பேணுவதிலும் அத்தனை லயிப்பு, குழந்தை வளர்ப்பிலும் ஓர் அகராதி. சொத்து ஒன்றுமில்லை.

விவசாயமும், ஓய்வூதியமும் கைகொடுத்தது.