சிறார் கையில் ஸ்மார்ட் போன்... தடுப்பது அவசியம் என்?

சிறார்கள் கையில் ஸ்மார்ட் ஃபோனை கொடுத்துவிட்டு பெற்றோர்கள் படும் அவதி பெரும் அவதிதான். கேரளா மாநிலம் திருச்சூரைச் சேர்ந்த - அசோக்குமாரின் மகள் ஆதித்யஸ்ரீ. தனியார் பள்ளியில் மூன்றாம் வகுப்பு படித்து வந்திருக்கிறார்

- நெல்லை பரிதி

லாக்டவுன் காலத்தில் ஆன்லைன் வகுப்பில் படிப்பதற்காக ஆதித்யஸ்ரீக்கு செல்போனை வாங்கிக் கொடுத்திருக்கிறார்கள்.

ஆனால், படிப்பு நேரம்போக பொழுது போக்கிற்காகவும் செல்போனை பயன்படுத்த தொடங்கியிருக்கிறார் ஆதித்யஸ்ரீ.

பெற்றோர் இருவரும் வேலைக்கு சென்ற காரணத்தால் ஆதித்யஸ்ரீ செல்போனும், கையுமாகவே இருந்துள்ளார். தொடர்ந்து யூடியூபில் வீடியோ பார்த்த நிலையில் கையிலிருந்த செல்போன் சூடாகி திடீரென்று வெடித்து சிதறியிருக்கிறது. எதிர்பாராமல் நடந்த இச்சம்பவத்தால் ஆதித்யஸ்ரீயின் கை மற்றும் முகத்தில் பலத்த காயம் ஏற்பட்டுள்ளது. உடனே பெற்றோர் மருத்துவமனைக்கு அழைத்துச் சென்றிருக்கிறார்கள். ஆனால், சிகிச்சை பலனின்றி ஆதித்யஸ்ரீ பரிதாபமாக இறந்துபோயிருக்கிறார். இது கடந்த வார சோகம்.

மறுபுறம் இங்கு சைபர் குற்றங்களுக்கு இலக்காகும் சிறுவர், சிறுமியர் 22 சதவீதம் பேர். இது சர்வதேச அளவில் 17 சதவீதமாக உள்ளது.

முன்பெல்லாம் செல்போன் வாங்கித்தராவிட்டால் குழந்தைகள் தற்கொலை செய்தனர். இப்போது திருடியாவது பயன்படுத்த தொடங்கிவிட்டனர்.

★ வானகரம், பள்ளிக்குப்பத்தில் வீட்டின் முன்பு நின்று செல்போனில் பேசிக் கொண்டிருந்த ஓய்வு பெற்ற எஸ்ஐ ஒருவரின் மனைவி கையிலிருந்த விலை உயர்ந்த செல்போனை பைக்கில் வந்த 3 மர்ம நபர்கள் பறித்துக் கொண்டு தப்பினர். மூவரும் 17 வயதுக்குட்பட்ட சிறுவர்கள்.