സിനിമയുടെ ആത്മീയ

വൈബ്രൻറായ കാരക്ടറുകൾക്ക് കാത്തിരിക്കുകയാണ് മലയാള സിനിമയുടെ വിഷാദ നായിക ആത്മീയ രാജൻ...

- എസ്. ആനന്ദ് രാജ്

ജോസഫിലെ നായികയായി പ്രേക്ഷകരുടെ മനസ്സിൽ ഇടം നേടിയ താരമാണ് ആത്മീയ രാജൻ. ഒടുവിൽ പുറത്തിറങ്ങിയ നിഗൂഢതകളുടെ ചുരുളഴിച്ച സസ്പെൻസ് ത്രില്ലർ ‘ജോൺ ലൂഥർ ഹിറ്റായതിന്റെ സന്തോഷത്തിലാണ് താരം.

2009ൽ പുറത്തിറങ്ങിയ വെള്ളത്തൂവലി'ലൂടെയാണ് ആത്മീയ മലയാള സിനിമയിലെത്തുന്നത്. 2012ൽ തമിഴിൽ സൂപ്പർ ഹിറ്റായ മനം കൊത്തി പറവൈ, റോസ് ഗിറ്റാറിനാൽ, കോൾഡ് കേസ്, അമീബ, മാർക്കോണി മത്തായി, ജോസഫിന്റെ തെലുങ്ക് വേർഷൻ ശേഖർ എന്നിവ ഉൾപ്പെടെ മലയാളത്തിലും തമിഴിലും തെലുങ്കിലും പ്രേക്ഷകരുടെ പ്രിയ താരമായി മാറിക്കഴിഞ്ഞു ആത്മീയ. നാമം എന്ന സിനിമയിലെ പ്രകടനത്തിന് ഫിലിം ക്രിട്ടിക്സ് അസോസി യേഷൻ സ്പെഷൽ ജൂറി അവാർഡും ആത്മീയയെ തേടിയെത്തി. ആത്മീയ സിനിമ, കുടുംബ ജീവിതം പങ്കുവെക്കുന്നു...

ജോസഫിലെ നായിക

ആത്മീയ രാജൻ പ്രേക്ഷകർക്ക് എപ്പോഴും ജോസഫിലെ നായികയാണ്. ആത്മീയ എന്ന പേര് ഓർക്കാത്തവർക്കു പോലും ജോസഫിലെ നായികയെ അറിയാം. വെള്ളത്തുവലിലൂടെയാണ് ആത്മീയ മലയാള സിനിമയിലേക്ക് എത്തിയതെങ്കിലും ജോജു ജോർജ് നായകനായി 2018ൽ ഇറങ്ങിയ ഹിറ്റ് സിനിമ ജോസഫിലൂടെയാണ് മലയാളത്തിൽ സ്ഥാനം ഉറപ്പിക്കുന്നത്. ചിത്രത്തിലെ 'പൂമുത്തോളേ' എന്ന ഹിറ്റ് ഗാനം ആത്മീയക്ക് നൽകിയത് വൻ റീച്ച് ആണ്.

“മനം കൊത്തി പറവൈ, റോസ് ഗിറ്റാറിനാൽ എന്നീ സിനിമകൾ 2012-13ൽ ചെയ്തെങ്കിലും തുടർന്ന് ഒരു ബ്രേക്ക് എടുത്തിരുന്നു. നല്ലൊരു ഗാപ്പിനുശേഷം മലയാളത്തിൽ വന്ന പ്രോജക്ട് ആയിരുന്നു ജോസഫ്. പപ്പേട്ടന്റെ ഡയറക്ഷൻ, നല്ല സ്ക്രിപ്റ്റ്. ഒരു നല്ല റീഎൻട്രി ആയിരിക്കും എന്ന് എനിക്ക് തോന്നി. അങ്ങനെയാണ് ആ പ്രോജക്ടിന്റെ ഭാഗമാകുന്നത്. ജോസഫിലൂടെയാണ് പ്രേക്ഷകർ എന്നെ തിരിച്ചറിഞ്ഞു തുടങ്ങിയത് എന്ന് തോന്നുന്നു.

സിനിമ എന്നും സ്വപ്നം

കുട്ടിക്കാലം മുതലേ സിനിമ ഇഷ്ടമായിരുന്നു. സിനിമയായിരുന്നു സ്വപ്നം. അതിനുള്ള ബാക്ഗ്രൗണ്ട് ഒന്നും ഇല്ലെങ്കിലും അതു തന്നെയായിരുന്നു ഇഷ്ടം. അക്കാലത്ത് സിനിമയെ കുറിച്ച് ഒരു ഐഡിയയും ഉണ്ടായിരുന്നില്ല. ലാലേട്ടനെയും ശോഭനയെയും കണ്ടുള്ള ഇഷ്ടമെന്നല്ലാതെ. ഒരു പക്ഷേ ആ ഇഷ്ടം ഗ്ലാമർ ഇൻഡസ്ട്രിയോടുള്ള ആരാധനയാകാം. എന്റെ സിനിമയുടെ പരസ്യം വരുന്നതും അതിന്റെ ടാഗ് ലൈനുമൊക്കെ സ്വപ്നം കണ്ടു നടന്ന കാലം. പക്ഷേ, ഒരിക്കലും എത്തിപ്പെടുമെന്ന് വിചാരിച്ചിരുന്നില്ല.