സന്തുഷ്ട ജീവിതത്തിന് ഇതാ ഈ മന്ത്രങ്ങൾ

മാനസികവും ശാരീരികവുമായ ആരോഗ്യമുള്ളവർക്ക് അധ്വാനിച്ചുണ്ടാക്കുന്നതുകൊണ്ട് സുഖമായി ജീവിക്കാനും ഭാവി ഭദ്രമാക്കാനും സഹായിക്കുന്ന പ്രായോഗികമായ 25 നിർദേശങ്ങൾ.

കഴിഞ്ഞ രണ്ടു പതിറ്റാണ്ടെടുത്താൽ കേരളത്തിലെ വിവിധതലങ്ങളിൽ പെട്ടവരുടെ വരുമാനത്തിൽ മാത്രമല്ല ജീവിത സാഹചര്യങ്ങളിലും വലിയ കുതിപ്പുണ്ടായിട്ടുണ്ട്. പട്ടിണി മാറുകയും ഇഷ്ടാനുസരണമുള്ള ഭക്ഷണം ഏതാണ്ട് എല്ലാവർക്കും കിട്ടുകയും ചെയ്യുന്നു എന്നതു മാത്രമല്ല ആ മാറ്റം. ജീവിക്കാൻ നല്ല വീടും സഞ്ചരിക്കാൻ സ്വന്തം വാഹനവും ഗൃഹോപകരണങ്ങളുമെല്ലാം ഇന്ന് സാദാ കുടുംബങ്ങളിലുമുണ്ട്. ഈയിടെ ദേശീയതലത്തിൽ വന്ന ഒരു പഠന റിപ്പോർട്ട് തന്നെ ഇക്കാര്യത്തിലേക്കു വിരൽ ചൂണ്ടുന്നു.

കേരളത്തിലെ നാലിൽ ഒന്ന് കുടുംബങ്ങൾക്കും കാറുണ്ടെന്നും ദേശീയ ശരാശരിയുടെ മൂന്നിരട്ടിയാണിതെന്നുമാണ് ആ കണക്ക്. പക്ഷേ, ഇതിനു ഭയാനകമായ ഒരു മറുവശം കൂടിയുള്ളതു കാണാതെ പോകരുത്. വായ്പാ കെണിയിൽ വീണ് വ്യക്തികളോ കുടുംബം ഒന്നാകെയോ ആത്മഹത്യ ചെയ്യുന്നു എന്ന വാർത്തകൾ എന്നും എപ്പോഴും നമ്മുടെ ചുറ്റുമുണ്ട്. ആവശ്യത്തിനു പണമുണ്ടായിട്ടും സന്തോഷത്തോടെ ജീവിക്കാനാകാത്തവരുടെ എണ്ണം സമൂഹത്തിൽ അനുദിനം വർധിക്കുന്നു. എന്തുകൊണ്ടാണിത്?

കാരണങ്ങൾ പലതായിരിക്കും. പരിഹാരങ്ങളും വ്യത്യസ്തമായിരിക്കും. എങ്കിലും ചില കാര്യങ്ങൾ ശ്രദ്ധിച്ചാൽ പ്രശ്നങ്ങൾ വലിയതോതിൽ പരിഹരിക്കാനാകും. അതിനാവശ്യമായ ചില നിർദേശങ്ങൾ ആണ് ഇവിടെ മുന്നോട്ടു വയ്ക്കുന്നത്.

മാനസികവും ശാരീരികവുമായ ആരോഗ്യമുള്ളവരും, അധ്വാനിച്ച് വരുമാനമുണ്ടാക്കുകയും ചെയ്യുന്നവർക്ക് പ്രായോഗികമാക്കാവുന്നവ. ഇവ പാലിച്ചാൽ സന്തോഷവും സുഖവും നിറഞ്ഞ കുടുംബജീവിതം നേടിയെടുക്കാൻ വലിയൊരു പരിധിയോളം നിങ്ങൾക്കും കഴിയും.

അധ്വാനിച്ചു ജീവിക്കുക

ജോലിയോ ബിസിനസോ പ്രഫഷനോ എന്തുമാകട്ടെ അധ്വാനിക്കാൻ തയാറുള്ളവർക്ക് സുഖമായി ജീവിക്കാനുള്ള വരുമാനം ഉണ്ടാക്കാൻ ഇന്നത്തെ കാലത്ത് സാധിക്കും. തുടക്കത്തിൽ പലർക്കും അൽപം കൂടുതൽ ബുദ്ധിമുട്ടേണ്ടി വരാം. എന്നാൽ ഇന്നു നാം കാണുന്ന മികച്ച വിജയം നേടിയവരിൽ ഭൂരിപക്ഷവും തുടക്കത്തിൽ നന്നായി ബുദ്ധിമുട്ടുകയും അധ്വാനിക്കുകയും ചെയ്തവരാണ്. അധ്വാനിച്ചു കിട്ടുന്നതോ അതിൽനിന്നു നിക്ഷേപിച്ചുണ്ടാക്കുന്നതോ കൊണ്ടു ജീവിച്ചാൽ സുഖവും സമാധാനവും ഉണ്ടാകും. അതു നിലനിൽക്കുകയും ചെയ്യും.