ഇതാ ഇന്ത്യൻ ഓഹരി വിപണിയിലെ വാലു പിക്ക്

ഇന്ത്യൻ ഓഹരി വിപണിയിൽ ദേശീയതലത്തിൽ തന്നെ ഏറെ ശ്രദ്ധേയമായ വാല പിക്ക് എന്ന ബ്ലോഗിനു പിന്നിലെ മലയാളി നിക്ഷേപകനെ പരിചയപ്പെടാം.

കൃഷിയിടത്തിൽനിന്നു റബറിന്റെ ഒട്ടുപാൽ പറിച്ച് അതു മറിച്ചുവിറ്റ് വട്ടച്ചെലവിനു പണം കണ്ടെത്തിയിരുന്ന സാധാരണ കിഴക്കൻ ബാല്യമുള്ള ഒരാൾ. അയാളിന്ന് രാജ്യത്തെ ചെറുകിട നിക്ഷേപകരിൽ മുൻപന്തിയിലാണ്. തന്നെയുമല്ല, വാല്യു പിക്ക് എന്ന ബ്ലോഗ് വഴി ഇന്ത്യയിലെ ഏതു ഓഹരി നിക്ഷേപകർക്കും സുപരിചിതനുമാണ്.

വാല്യു പിക്ക് എന്ന പേരിൽ മറഞ്ഞിരിക്കുന്ന മലയാളിയായ നിക്ഷേപകന്റെ പേര് രാജേഷ് ജോസഫ്. ആള് മുംബൈയിലൊന്നുമല്ല ഇരിപ്പ്. നാട്ടിൽ തന്നെ. തനി നാടൻ, പാലാക്കാരൻ. എൻഐഎസ്എം (NISM ) സർട്ടിഫൈഡ് റിസർച് അനലിസ്റ്റ്, 90 കളിൽ കമ്പനികൾ ഓഹരി വിപണിയിൽ ഇറങ്ങുന്നതിന്റെ കടലാസുമായി (ഐപിഒ ഫോം) ഒരു ബന്ധു രാജേഷിന്റെ പിതാവിനെ കാണാൻ വീട്ടിൽ എത്തിയിടത്താണു തുടക്കം. അന്നു രാജേഷ് പാലാ സെന്റ് തോമസ് കോളജിൽ പ്രീഡിഗ്രി കഴിഞ്ഞ് ബിഎ ഇക്കണോമിക്സിനു ചേരാനിരിക്കുന്ന നേരം.

ഇംഗ്ലിഷ് പത്രത്തിനകത്ത് ഐപിഒ ഫോം വരുന്ന കാലമായിരുന്നു അത്. പിതാവും ബന്ധുവുമായുള്ള സംസാരം കേട്ടപ്പോൾ വട്ടച്ചെലവിനു പണമുണ്ടാക്കാൻ സ്കോപ് ഇതിലുണ്ടെന്നു തോന്നി. അച്ഛൻ ഐപിഒക്ക് അപേക്ഷിക്കുന്നതു നിരീക്ഷിച്ചു. പത്തു രൂപയ്ക്ക് അപേക്ഷിച്ച് അലോട്മെന്റ് ലഭിച്ച ഒരു കമ്പനിയുടെ ഓഹരി 22 രൂപയ്ക്ക് ലിസ്റ്റ് ചെയ്തപ്പോൾ ആവേശം കൂടി. 

പിന്നെ, 18 വയസ്സാകാനുള്ള കാത്തിരിപ്പായിരുന്നു. ചെലവുകൾ വെട്ടിച്ചുരുക്കി തയാറായി നിന്നു. പബ്ലിക് ഇഷ്യൂവിന്റെ ഫോമുകൾ സംഘടിപ്പിച്ചു. 18 ആയതും അപേക്ഷിച്ചു തുടങ്ങി. നല്ല കമ്പനികളുടെയൊന്നും ഓഹരി കിട്ടിയില്ല. പക്ഷേ, തല്ലിപ്പൊളി ഓഹരികൾ കിട്ടുകയും ചെയ്തു. ഫലം കനത്ത നഷ്ടം. 

എവിടെയാണു കുഴപ്പമെന്നു നന്നായി ആലോചിച്ചു.  നിലവാരത്തകർച്ചയുള്ള കമ്പനികൾ വാങ്ങിക്കൂട്ടി വച്ചിട്ട് ഒരു കാര്യവുമില്ലെന്നു മനസ്സിലായി. അന്ന് ഗുഡ് ബൈ പറഞ്ഞതാണു ജങ്കിനോട്.

ഓഹരി സർട്ടിഫിക്കറ്റുകളുടെ കാലമായിരുന്നു അത്. സുതാര്യതയും കുറവ്. ഓഹരി വരേണ്യവർഗത്തിന്റെ പരിപാടിയാണെന്ന ചിന്തയും കൂടി ഉണ്ടായതോടെ പരിപാടി തന്നെ മതിയാക്കിയാലോയെന്നു തോന്നി. എന്നാൽ, മറുവശത്ത് ഇതൊക്കെ പഠിച്ചെടുക്കണമെന്ന സ്മോൾ ടൗൺ ബേബി വാശിയും.