ക്രെഡിറ്റ് കാർഡ് എടുക്കും മുൻപേ

ഏതു സമയത്തും ഏതാവശ്യത്തിനും പണമുറപ്പാക്കുന്ന ക്രെഡിറ്റ് കാർഡുകൾ എന്നെന്നും നിങ്ങളുടെ ഉറ്റ മിത്രമായിരിക്കും, ചില കാര്യങ്ങൾ ശ്രദ്ധിച്ചാൽ.

അഞ്ചു വർഷത്തോളമായി കാർഡ് ഉപയോഗിക്കുന്ന ഐടി ക്രഡിറ്റ് ജീവനക്കാരനായ രാഹുൽ ഇപ്പോൾ അത് വേണ്ടെന്നു വയ്ക്കാനുള്ള ആലോചനയിലാണ്. കാർഡ് എടുത്തതിൽ പിന്നെ ഇഎംഐ ഒഴിഞ്ഞിട്ടില്ല. ഇഎംഐ സ്കീം ഉപയോഗിച്ച് അനാവശ്യമായി സാധനങ്ങൾ വാങ്ങിക്കൂട്ടിയതു മൂലം കടക്കെണിയിലുമായി എന്നാണു പരാതി. ഏതാവശ്യത്തിനും പോക്കറ്റിൽ പണം ഉണ്ടാവുക എന്നത് ചില്ലറക്കാര്യമല്ല. കൃത്യമായ പ്ലാനിങ്ങും സാമ്പത്തിക അച്ചടക്കവും പാലിച്ചാണ് ഇതുവരെ ആളുകൾ ഇതു സാധിച്ചിരുന്നത്. എന്നാൽ, ഇന്നു പലരും, പ്രത്യേകിച്ചു പുതുതലമുറ, ഏതാവശ്യത്തിനും സമയാസമയം പണമുറപ്പാക്കുന്നത് ക്രഡിറ്റ് കാർഡുകളിലൂടെയാണ്. ജോലി ചെയ്യാൻ തുടങ്ങിയാൽ ഉടനെ ക്രഡിറ്റ് കാർഡ് എടുക്കുന്നവരാണു ഭൂരിഭാഗവും. കാർഡ് കൊണ്ടുള്ള ഗുണങ്ങൾ ഒട്ടേറെയാണ്. പക്ഷേ, നിങ്ങളെ എന്നെന്നും കടക്കെണിയിലേക്കു തള്ളിയിടുന്ന വില്ലനായി ഏതു സമയത്തും ഇവ മാറാം. അതൊഴിവാക്കാൻ ക്രഡിറ്റ് കാർഡിന്റെ ഗുണവും ദോഷവും അറിഞ്ഞ് ഉപയോഗിച്ചാൽ മാത്രം മതി.

പലിശയില്ലാ വായ്പ 

 ശരിയായി ഉപയോഗിച്ചാൽ ക്രഡിറ്റ് കാർഡിലൂടെ ഒന്നര മാസത്തോളം പലിശരഹിത വായ്പയായി പണം ഉറപ്പാക്കാം. പക്ഷേ, കൃത്യമായി അടച്ചില്ലെങ്കിൽ വലിയ പലിശ നൽകേണ്ടി വരും. ഓഫറും ഡിസ്കൗണ്ടും ഉപയോഗിച്ച് വലിയ തുക ലാഭിക്കാനവസരവുമുണ്ട്. പക്ഷേ, അവ പിന്നാലെ പോയാൽ പണി കിട്ടുകയും ചെയ്യും.