എന്തും ഏതും എങ്ങനെയും തിരയാം, കണ്ടെത്താം ചെയ്യാം

നിങ്ങൾക്ക് ആവശ്യമായ എന്തും ഏതും എങ്ങനെയും തിരയാം കണ്ടെത്താം എന്നു മാത്രമല്ല, പലതും മനുഷ്യസാധ്യമായതിലും കൂടുതൽ വേഗത്തിൽ, കൂടുതൽ മികവോടെ ചെയ്തെടുക്കാനും കഴിയും.

ഗൂഗിൾ സേർച്ചിൽ എന്തെങ്കിലും തിരയാത്തവർ നമുക്കിടയിൽ ഉണ്ടാകാൻ ഇടയില്ല. ഇന്റർനെറ്റ് അടിസ്ഥാനമാക്കിയുള്ള ആ തിരിച്ചലിന്റെ വ്യാപ്തിയും ആഴവും മാത്രമല്ല, ഫലവും ഇതാ ഇപ്പോൾ നിർമിതബുദ്ധിയെന്ന എഐ പല മടങ്ങാക്കി വർധിപ്പിച്ചിരിക്കുന്നു. ഏതാനും മാസങ്ങൾക്കു മുൻപു മാത്രം പിറവിയെടുത്ത ചാറ്റ് ജിപിടി ലോകത്തെ മുഴുവൻ അമ്പരപ്പിച്ചതും എഐയുടെ ആ മാന്ത്രിക കഴിവുകളിലൂടെയാണ്.

ചാറ്റ് ജിപിടിക്കു പിന്നാലെ ഗൂഗിളിന്റെ ബാർഡും മൈക്രോ സോഫ്റ്റിന്റെ ബിങ് എഐ (Bing Al) യും എത്തിക്കഴിഞ്ഞു.

ഇതോടെ നിങ്ങൾക്കാവശ്യമായ എന്തും ഏതും എങ്ങനെയും തിരയാം, കണ്ടെത്താം. എന്നു മാത്രമല്ല, പലതും മനുഷ്യസാധ്യമായതിലും കൂടുതൽ വേഗത്തിൽ കൂടുതൽ മികവോടെ കൃത്യതയോടെ ചെയ്തെടുക്കാനും കഴിയും.

തൊഴിൽ ചെയ്യുന്നവർക്ക് വിവിധ മേഖലകളിൽ ജോലി ചെയ്യുന്നവർക്ക് എഐ ഉപയോഗപ്പെടുത്തി തങ്ങളുടെ ജോലികൾ വളരെ ഈസിയായും പതിൻമടങ്ങ് മികവോടെയും ചെയ്യാനാകും. ഡേറ്റകൾ വിശകലനം ചെയ്ത് റിപ്പോർട്ടുകൾ തയാറാക്കാം. അത് എഴുതി തയാറാക്കാനും പ്രവർ പോയിന്റ് പ്രസന്റേഷനാക്കാനും നിമിഷങ്ങൾ മതി. അതിനാവശ്യമായ ഗ്രാഫുകളും ചിത്രങ്ങളും വിശകലനങ്ങളും എല്ലാം എഐ നിങ്ങൾക്കായി റെഡിയാക്കി തരികയും ചെയ്യും..

വിദ്യാർഥികൾക്ക് പഠനത്തിനാവശ്യമായ എല്ലാ വിവരങ്ങളും വിരൽത്തുമ്പിൽ കിട്ടുമെന്നു മാത്രമല്ല, മേൽപറഞ്ഞപോലെ പ്രോജക്ട് റിപ്പോർട്ടുകളും അസൈൻമെന്റുകളും മികവോടെ വേഗത്തിൽ ചെയ്തെടുക്കാനും ആകും. ചിത്രങ്ങളും ഗ്രാഫും ടേബിളുമൊക്കെ ആവശ്യാനുസരണം തയാറാക്കാം. ഏതു വിഷയത്തെക്കുറിച്ചും ആവശ്യമുള്ള വലുപ്പത്തിൽ ലേഖനങ്ങളോ ഉപന്യാസങ്ങളോ എന്തിന്, കഥയോ കവിതയോ വരെ എഴുതിത്തരും.

ഓഹരി വിപണി

ലോകമെമ്പാടുമുള്ള വിപണികളിലെ ഇതുവരെ ലഭ്യമായ ഡേറ്റകൾ വിശകലനം ചെയ്യാനും ഏത് ഓഹരിയിൽ ഏതു സമയത്ത് നിക്ഷേപിക്കണം,പിൻവലിക്കണം എന്നിവയിലടക്കം മികച്ച പ്രവചനം നടത്താനും എഐക്ക്  വേഗത്തിൽ കഴിയുമെന്നാണു റിപ്പോർട്ട്. അതുകൊണ്ട്, ഓഹരി വിപണിയിൽ എഐ പിന്തുണ തേടുന്ന നിക്ഷേപകരുടെയും ട്രേഡർമാരുടെയും എണ്ണം വർധിച്ചു വരുകയാണ്.