ഫിനാൻഷ്യൽ ഫ്രീഡം നേടാം ഈ ചുവടുകളിൽ

അച്ചടക്കത്തോടെ നടന്നാൽ ആർക്കും ലക്ഷ്യത്തിലെത്താം.

കടങ്ങൾ ഭാരമാകാതെ ഇഷ്ടമുള്ളതെല്ലാം ചെയ്യാവുന്ന സാമ്പത്തിക സാഹചര്യം അഥവാ ഫിനാൻഷ്യൽ ഫ്രീഡം എല്ലാവരും ആഗ്രഹിക്കുന്നുണ്ട്. നിർഭാഗ്യവശാൽ ഭൂരിഭാഗം പേരുടെയും സ്ഥിതി തിരിച്ചാണ്. തെറ്റായ ജീവിതശൈലിയും നിക്ഷേപതീരുമാനങ്ങളും അടക്കമുള്ള പല കാരണങ്ങളാൽ ബാധ്യതകളിൽ കുടുങ്ങി ജീവിക്കുന്നവർ ഇതിൽനിന്ന് എങ്ങനെ രക്ഷപ്പെടും?

അതിന് ആദ്യം ഒരു കാര്യം മനസ്സിലാക്കണം. സാമ്പത്തിക സ്വാതന്ത്ര്യം ഒറ്റരാത്രികൊണ്ട് നേടാനാകില്ല. അതൊരു യാത്രയാണ്. ലക്ഷ്യത്തിലെത്താൻ കാര്യങ്ങൾ ആസൂത്രണം ചെയ്യണം. പറയുമ്പോൾ ലളിതമാണെങ്കിലും നടപ്പാക്കാൻ എളുപ്പമല്ല. അതിനുള്ള 11 ചുവടുകളാണ് താഴെ പറയുന്നത്.

1. ആദ്യം മനസ്സിനെ പാകപ്പെടുത്തുക. സാമ്പത്തിക അച്ചടക്കം പാലിക്കാൻ ആദ്യം മനസ്സു തയാറാകണം. ആരോഗ്യം നിലനിർത്താൻ വ്യായാമം വേണമെന്ന് അറിയാത്തവരില്ല. എന്നാൽ, അസുഖങ്ങൾ വന്ന് വേറെ വഴിയില്ലാതാകുമ്പോഴാണ് വ്യായാമം തുടങ്ങുന്നത്. നിക്ഷേപത്തിന്റെ കാര്യവും ഇതുപോലെയാണ്. വരവറിഞ്ഞ്, ചെലവഴിക്കുകയും അനുയോജ്യമായ നിക്ഷേപരീതി പിന്തുടരുകയും ചെയ്താൽ സാമ്പത്തികാരോഗ്യം ഉറപ്പാക്കാം. പലപ്പോഴും, നിക്ഷേപത്തെക്കുറിച്ചുള്ള ചിന്ത വളരെ വൈകിയാവും ഉദിക്കുക. അപ്പോൾ പെട്ടെന്നു പണം ഉണ്ടാക്കാനായി കുഴപ്പം പിടിച്ച പദ്ധതികളിൽ നിക്ഷേപിച്ച് കഷ്ടപ്പെട്ടുണ്ടാക്കിയ പണം നശിപ്പിക്കുകയും ചെയ്യും. അതിനാൽ, ഫിനാൻഷ്യൽ ഫ്രീഡം നേടാൻ മനസ്സിനെ പാകപ്പെടുത്തുക.