ലിക്വിഡ് ഫണ്ട് കുറച്ചു ദിവസത്തേക്ക് നിക്ഷേപിക്കാം കൂടുതൽ നേടാം

ബാങ്ക് എസ്ബി -കറന്റ് അക്കൗണ്ടുകളിൽ സൂക്ഷിക്കുന്ന പണത്തിന് കൂടുതൽ ആദായം നേടാൻ മികച്ച അവസരം ഈ മ്യൂച്വൽ ഫണ്ടുകൾ തരുന്നു.

പലിശ ഇല്ലാതെ കറന്റ് അക്കൗണ്ടിൽ സൂക്ഷിക്കേണ്ടി വരുന്ന വലിയ തുകകൾക്ക് ഏഴു ശതമാനത്തോളം ആദായം നേടാനായാൽ ചെറുതും വലുതുമായ ബിസിനസുകാർക്ക് ഏറെ നേട്ടം ഉണ്ടാക്കാനാകില്ലേ? അതും സേവിങ്സ് അക്കൗണ്ടിലേതുപോലുള്ള പണമിടപാടു സൗകര്യത്തോടെ ആയാലോ? അതിനുള്ള അവസരമാണ് ലിക്വിഡ് ഫണ്ടുകൾ തുറന്നിടുന്നത്.

ആരാണു നിക്ഷേപിക്കേണ്ടത്?

 നല്ലൊരു തുക റോൾ ചെയ്യുന്നവർക്ക് കുറഞ്ഞ അപകടസാധ്യതകളുള്ള ഒരു ഹ്രസ്വകാല നിക്ഷേപ ഓപ്ഷൻ എന്ന നിലയിൽ ലിക്വിഡ് ഫണ്ട് അനുയോജ്യമാണ്. നിങ്ങളുടെ പണത്തിന് എസ്ബി അക്കൗണ്ടിനെക്കാൾ മികച്ച ആദായം കിട്ടുമെന്നു മാത്രമല്ല, ആവശ്യമുളളപ്പോൾ പണമാക്കാവുന്ന ലിക്വിഡിറ്റിയും ഉണ്ട്. കുറച്ച് ദിവ ളോ ആഴ്ചകളോ ഉള്ള ഹ്രസ്വകാല നിക്ഷേപമാണ് ആഗ്രഹിക്കുന്നതെങ്കിൽ ലിക്വിഡ് ഫണ്ട് തിരഞ്ഞെടുക്കാം.

എസ്ബി (സേവിങ്സ് ബാങ്ക്) അക്കൗണ്ടിനെക്കാൾ ഉയർന്ന പലിശ നേടാവുന്ന ഹ്രസ്വകാല നിക്ഷേപമാണ് തിരയുന്നതെങ്കിൽ ഈ ഫണ്ടുകൾ ഏറ്റവും അനുയോജ്യമാണ്. 7 ദിവസം മുതൽ 3 മാസം വരെയുള്ള സമയം കൈവശം വയ്ക്കേണ്ടി വരുന്ന വലിയ തുകകൾ നിക്ഷേപിക്കാൻ ഏറ്റവും മികച്ചത്.

എസ്ബിയിൽ നിക്ഷേപിക്കുന്ന സാധാരണക്കാർക്കും കറന്റ് അക്കൗണ്ടിൽ പണം സൂക്ഷിക്കുന്ന ബിസിനസുകാർക്കും കൂടുതൽ വരുമാനം നേടാൻ അനുയോജ്യം.