മഞ്ഞു കയറ്റുമതിയും ഉരുളക്കിഴങ്ങ് ആശംസയും

പണമില്ലാത്തവൻ പിണം' എന്ന പഴഞ്ചൊല്ല് പുതിയ കാലത്ത് കൂടുതൽ പഴഞ്ചനായിരിക്കുന്നു. പണത്തിനു മീതെ പറക്കുന്ന ആശയങ്ങളാണ് പുതിയകാല വിജയത്തിന്റെ നട്ടെല്ല്.

- പുളിക്കൻസ്

നമ്മുടെ അതേ സാധനങ്ങൾ വിൽക്കുന്ന തൊട്ടടുത്ത കടക്കാരൻ കടയ്ക്കു മുന്നിൽ ഏറ്റവും വിലക്കുറവുള്ള കട എന്ന ബോർഡു വച്ചാൽ നിങ്ങളെന്തു ചെയ്യും? നിങ്ങളുടെ കടയ്ക്കുമുന്നിൽ പ്രധാന കവാടം എന്നൊരു ബോർഡു വച്ചാൽ മാത്രം മതിയാവില്ലേ. എങ്ങനെയുണ്ട് ഐഡിയ.

അമേരിക്കയിലെ ബോസ്റ്റണിൽ താമസിക്കുന്ന കെയ്ൽ വാറിങ് നടത്തിയ ആലോചന അദ്ദേഹത്തെപ്പോലും പൊട്ടിച്ചിരിപ്പിച്ചു. പക്ഷേ, കളി കാര്യമായത് കെയ്ൽ തന്റെ "വിഡ്ഢിത്തം പരീക്ഷിക്കാൻ ഇറങ്ങിപ്പുറപ്പെട്ടപ്പോഴാണ്. എന്താണ് ആ തലയിൽ വിരിഞ്ഞ ആശയം എന്നല്ലേ? ബോസ്റ്റണിലെ മഞ്ഞെടുത്തു പൊതിഞ്ഞ് ചൂടുള്ള സ്ഥലത്തു വിൽക്കുക. ഇതു കേട്ടാൽ ആരാണ് ചിരിച്ചു വശം കെടാത്തത്. പക്ഷേ, കെയ്ൽ ചിരിയോടൊപ്പം ചിന്തകൂടി കലർത്തി.