ജുവലിന്റെ Merry Christmas

പതിവുപോലെ ഇത്തവണയും നടിയും അവതാരകയുമായ ജുവൽ മേരിയുടെ ക്രിസ്മസ് തൃപ്പൂണിത്തുറയിൽ കുടുംബത്തിനൊപ്പമാണ്. സിനിമാവിശേഷങ്ങൾക്കൊപ്പം കുട്ടിക്കാല ക്രിസ്മസ് ഓർമകളും ജുവൽ പങ്കുവെക്കുന്നു...

- രമ്യ പദ്മിനി

ഓരോ വർഷവും നവംബർ ഇങ്ങെത്തുമ്പോഴേക്കും ജുവൽ മേരിയുടെ മനസ്സിൽ ഓർമകളുടെ ക്രിസ്മസ് വിളക്കുകൾ തെളിയും. അവക്കെല്ലാം കുട്ടിക്കാലത്തിന്റെ സുഗന്ധമാണ്. കാലം മുന്നോട്ടു പോകുമ്പോൾ അത്രയും മധുരമെന്ന് പറയാൻ കഴിയില്ലെങ്കിലും ഓരോ ക്രിസ്മസ് കാലവും വന്നെത്തുന്നത് പ്രത്യാശയുടെ സന്ദേശവുമായാണ്. പതിവുപോലെ ഇത്തവണയും തൃപ്പൂണിത്തുറയിൽ കുടുംബത്തിനൊപ്പമാണ് ക്രിസ്മസ് ആഘോഷം. അതിനായുള്ള പ്ലാനിങ്ങക്കെ നേരത്തേ നടത്തിക്കഴിഞ്ഞു. നിഷാന്ത് സാറ്റു തിരക്കഥയെഴുതി സംവിധാനം ചെയ്ത 'എ രഞ്ജിത്ത് സിനിമ' എന്ന ചിത്രമാണ് ജുവലിന്റെ മറ്റൊരു സന്തോഷം. അതിനൊപ്പം യാത്രകളും പാചകവും എല്ലാമുണ്ട്. ജുവലിന്റെ വിശേഷങ്ങളിലേക്ക്...

ഓർമകളിലെ ക്രിസ്മസ്

 ക്രിസ്മസ് എന്നു കേൾക്കു മ്പോൾതന്നെ സന്തോഷം തുളുമ്പും മനസ്സിൽ കുട്ടിക്കാലത്തെ ഏറ്റവും മധുരമുള്ള ഓർമകളെല്ലാം ക്രിസ്മസുമായി ബന്ധപ്പെട്ടുള്ളതാണ്. ഞങ്ങൾ മൂന്നു മക്കളാണ്. ക്രിസ്മസിന് മുമ്പേതന്നെ ഒരുക്കങ്ങൾ തുടങ്ങും. ആ സമയത്ത് സ്കൂൾ അവധിയായിരിക്കുമല്ലോ... വീട്ടിൽ കളിയും ചിരിയുമായി ആകെ ബഹളമായിരിക്കും. പിന്നെ പള്ളിയിൽ പോകും. ക്രിസ്മസിന് അമ്മവീട്ടിലേക്കുള്ള യാത്രയുണ്ടാകും. അതിനായി ഞങ്ങൾ കാത്തിരിക്കുന്നതൊക്കെ ഇപ്പോൾ ഓർക്കുമ്പോൾ രസമാണ്. സന്തോഷം മാത്രം നിറഞ്ഞ കാലമായിരുന്നു അന്ന് വീട്ടിൽ ബന്ധുക്കളൊക്കെ വിരുന്നിന് വരും. ഞങ്ങളും വിരുന്നുപോകും. എനിക്ക് തോന്നുന്നത് കുട്ടിക്കാലത്തായിരിക്കും അത്രയും ഗംഭീരമായി ഓരോ ആഘോഷത്തെയും കാത്തിരിക്കുകയും പൊലിപ്പിക്കുകയുമൊക്കെ ചെയ്യുന്നത്.

സ്റ്റുഡിയോയിലെ നിറപ്പകിട്ടുള്ള ക്രിസ്മസ്