പ്രേമലുവിലെ ചങ്കത്തി

'പ്രേമലു' എന്ന ചിത്രത്തിലെ കാർത്തികയെ ഗംഭീരമായി അവതരിപ്പിച്ച് ശ്രദ്ധനേടിയ അഖില ഭാർഗവൻ സിനിമാവിശേഷങ്ങൾ പങ്കുവെക്കുന്നു

- രമ്യ പത്മിനി

തീയറ്ററുകളെ യൂത്തിന്റെ ആഘോഷവേദിയാക്കി മാറ്റിയ 'പ്രേമലു' എന്ന ചിത്രത്തിലെ കാർത്തികയെപ്പോലൊരു കൂട്ടുകാരിയെ കിട്ടിയെങ്കിൽ എന്ന് ആഗ്രഹിക്കാത്തവരുണ്ടാകില്ല. അത്ര നല്ല ചങ്കത്തി. യാത്രക്ക് ഒരുങ്ങാനാണെങ്കിലും ചായ കുടിക്കാനാണെങ്കിലും കുസൃതി കാണിക്കാനാണെങ്കിലും ഒപ്പത്തിനൊപ്പം. കാർത്തികയെ ഗംഭീരമായി അവതരിപ്പിച്ചത് കണ്ണൂർ പയ്യന്നൂർക്കാരി അഖില ഭാർഗവനാണ്. 'അനുരാഗ് എഞ്ചിനീയറിംഗ് വർക്സ്' എന്ന ഷോർട്ട് ഫിലിമിലെ മികവുറ്റ പ്രകടനമാണ് അഖിലയെ ശ്രദ്ധേയയാക്കിയത്. പൂവൻ, അയൽവാശി എന്നീ സിനിമകളിലാണ് നേരത്തേ അഭിനയിച്ചത്.

പ്രേമലു കഴിഞ്ഞ് ലഭിക്കുന്ന പ്രതികരണങ്ങൾ അഖിലയുടെ ആത്മവിശ്വാസം വർധിപ്പിച്ചിട്ടുണ്ട്. മികച്ച കഥാപാത്രങ്ങൾ തേടിയെത്തിയാൽ നന്നായി ചെയ്യാൻ കഴിയുമെന്നു തന്നെയാണ് പ്രതീക്ഷ. അഖില വിശേഷങ്ങൾ പങ്കുവെക്കുന്നു...

വൈറലായി. പിന്നെ അഭിനയം

സിനിമ വലിയ ഇഷ്ടമായിരുന്നെങ്കിലും അഭിനയിക്കണമെന്ന ആഗ്രഹം ഉള്ളിലുണ്ടായിരുന്നില്ല. കലാപരമായി എന്തെങ്കിലും ചെയ്യണമെന്നായിരുന്നു. നൃത്തം പഠിച്ചിട്ടുണ്ട്. ചെയ്യാൻ ഇഷ്ടവുമാണ്. ഡബ്സ്മാഷ്, മ്യൂസിക്കലി തുടങ്ങിയ ആപ്പുകൾ വന്നപ്പോൾ അതിൽ വിഡിയോ ചെയ്യാൻ തുടങ്ങി.