വിദേശ പഠനം കരുതലോടെ

വിദേശ പഠനം സ്വപ്നം കാണുന്ന വിദ്യാർഥികളുടെ എണ്ണം 'വർധിച്ചുവരുകയാണ്. പ്ലസ് ടു പൂർത്തിയാകുന്നതോടെ തന്നെ വിദേശത്തേക്ക് ചേക്കേറുന്നതിനെക്കുറിച്ചാണ് അവരുടെ ചിന്ത. വിദേശ പഠനം ആഗ്രഹിക്കുന്നവർ നടത്തേണ്ട തയാറെടുപ്പുകളും ശ്രദ്ധിക്കേണ്ട കാര്യങ്ങളുമറിയാം...

- ഫരീദ എം.ടി State resource person Cg and ac, Directorate of general education

വിദേശത്ത് പഠിക്കണമെന്നാഗ്രഹിക്കുന്ന കുട്ടികളുടെ എണ്ണം ദിനം പ്രതി വർധിച്ചുവരുകയാണ്. വിദേശത്ത് പഠിക്കുന്ന ഇന്ത്യൻ വിദ്യാർഥികളുടെ എണ്ണം താമസിയാതെ 20 ലക്ഷം കടക്കുമെന്നാണ് കണക്കുകൾ സൂചിപ്പിക്കുന്നത്. പ്ല സ്ടു പൂർത്തിയാകുന്നതോടെ തന്നെ വിദേശത്തേക്ക് ചേക്കേറുന്നതിനെക്കുറിച്ചാണ് വിദ്യാർഥികൾ ചിന്തിക്കുന്നത്.

യു.എസ്, യു.കെ, ചൈന, റഷ്യ, കാനഡ, ആസ്ട്രേലിയ, ന്യൂസിലൻഡ്, ജർമനി, സിംഗപ്പൂർ, അയർലൻഡ്, ഫ്രാൻസ്, നെതർലൻഡ്സ് തുടങ്ങിയ രാജ്യങ്ങളെയാണ് ഇന്ത്യൻ വിദ്യാർഥികൾ കൂടുതലായി ആശ്രയിക്കുന്നത്. പോളണ്ട്, സ്പെയിൻ, ഇറ്റലി, നോർവേ, ജപ്പാൻ, മലേഷ്യ, സൗത്ത് കൊറിയ, ലിത്വേനിയ, തുർക്കിയ, മാൾട്ട തുടങ്ങിയ രാജ്യങ്ങളിലും ഇന്ത്യൻ വിദ്യാർഥികൾ പഠിക്കുന്നുണ്ട്.

കുറഞ്ഞത് ഒരു വർഷം മുമ്പെങ്കിലും വിദേശ പഠനത്തിനുള്ള തയാറെടുപ്പുകൾ ആരംഭിക്കേണ്ടതുണ്ട്. പ്ലസ് ടുവിനുശേഷം അണ്ടർ ഗ്രാഷനാണോ അതോ ഡിഗ്രിക്കു ശേഷം പോസ്റ്റ് ഗ്രാഷനാണോ വിദേശത്ത് പഠിക്കേണ്ടത് എന്നതിൽ വ്യക്തമായ ധാരണ നേരത്തേ ഉണ്ടാക്കി വെക്കണം.

പ്ലാനിങ് പ്രധാനം

ഏറ്റവും അനുയോജ്യമായ ഉപരിപഠനമേഖല ആദ്യം കണ്ടത്തണം. പഠനത്തിനായി പരിഗണിക്കുന്ന രാജ്യത്തെ കാലാവസ്ഥ, സംസാര ഭാഷ, തൊഴിൽ ലഭ്യത, കുടിയേറ്റ നിയമങ്ങൾ, പഠനത്തിനും താമസത്തിനുമുള്ള ചെലവ് തുടങ്ങിയ കാര്യങ്ങൾ സൂക്ഷ്മമായി വിശകലനം ചെയ്യണം.