മണ്ണറിഞ്ഞ മനസ്സറിഞ്ഞ മന്ത്രി

മണ്ണിനെയും മനുഷ്യനെയും തൊട്ടറിഞ്ഞ് വളർന്ന ഒ.ആർ. കേളു മന്ത്രി എന്നതിനപ്പുറം നാടിന്റെ കേളുവേട്ടനാണ്

- ഒ. മുസ്തഫ

മാനന്തവാടിയിൽ നിന്ന് കാട്ടിക്കുളം -എടയൂർകുന്ന് റോഡിൽ 16 കിലോമീറ്റർ സഞ്ചരിച്ചാൽ കേരളത്തി ന്റെ പുതിയ പട്ടി കജാതി-പട്ടികവർഗ വികസന മന്ത്രി ഒ.ആർ. കേളുവിന്റെ വീട്ടിലെത്താം. ഒരു വീട് എന്നതിനപ്പുറം കുടുംബത്തിലെല്ലാവരും ഒരുമിച്ചെന്നോണം പാർക്കുന്ന തറവാടടക്കം സ്നേഹം പൂക്കുന്നയിടം.

മണ്ണിനെയും മനുഷ്യനെയും തൊട്ടറിഞ്ഞ് വളർന്ന ഒ.ആർ. കേളു, മന്ത്രിയെന്നതിനപ്പുറം നാടിന്റെ കേളുവേട്ടനാണ്. അതിരാവിലെ എഴുന്നേറ്റ് പറമ്പിൽ കിളക്കാനിറങ്ങുന്ന, കൃഷി ചെയ്യുന്ന കേളുവേട്ടൻ മന്ത്രിയായത് ദേശത്തിന്റെ മുഴുവൻ സന്തോഷമാകുന്നത് അതിനാലാണ്. എസ്റ്റേറ്റിലും മരക്കൂപ്പിലും കൂലിപ്പണിയെടുത്ത് ദാരിദ്ര്യത്തോട് പടവെട്ടി പടിപടിയായി വളർന്ന് മന്ത്രിക്കസേരയിലെത്തിയപ്പോഴും വിനയത്തിന്റെ നിറചിരി ആ ചുണ്ടിലുണ്ട്.

സ്നേഹം പൂക്കുന്നയിടം

1970ൽ ഓലഞ്ചേരി പുത്തൻമിറ്റം രാമൻ-പരേതയായ അമ്മു ദമ്പതികളുടെ മകനായി വയനാട് കാട്ടിക്കുളം മുള്ളൻകൊല്ലിയിലാണ് ഒ.ആർ. കേളുവിന്റെ ജനനം. പത്താംക്ലാസ് വരെയാണ് പഠിച്ചത്. ആദിവാസി കുറിച്യ വിഭാഗക്കാരനായ ഈ 54കാരന് അധ്വാനത്തോടൊപ്പം വായനയും ഇഷ്ടം. ഭാര്യ ശാന്ത വീട്ടമ്മ. മക്കളായ മിഥുന ബേഗൂർ റേഞ്ച് ബീറ്റ് ഫോറസ്റ്റ് ഓഫിസറും ഭാവന വിദ്യാർഥിനിയുമാണ്. രവി എന്ന അച്ചപ്പൻ, ലീല, ചന്ദ്രൻ എന്നിവർ സഹോദരങ്ങൾ.

തറവാട് വീട്ടിൽ പിതാവ് രാമനും ഭാര്യ കീരയുമാണ് താമസം. തൊട്ടടുത്താണ് മന്ത്രിയുടെയും മൂത്ത സഹോദരൻ രവിയുടെയും വീട്. ഇളയ സഹോദരൻ ചന്ദ്രൻ അൽപം അകലെ എടയൂർകുന്നിലാണ് താമസം. ഏക സഹോദരി ലീലയെ കണ്ണോത്ത്മലയിലേക്കാണ് വിവാഹം കഴിപ്പിച്ചത്. കാലമെത്ര കഴിഞ്ഞാലും വിടവുണ്ടാകാതെ വിളക്കിച്ചേർത്ത കുടുംബ ബന്ധമാണ് ഇവരുടേത്.

ആരെയും നിരാശരാക്കാതെ എല്ലാവരെയും കേൾക്കും