વામા-વિશ્વ બ્યુટી

હોમમેડ હેર સીરમ આપશે વાળને પોષણ

- હેતલ ભટ્ટ

વાળની ગુણવત્તાની જાળવણી માટે, યોગ્ય વિકાસ માટે સારા શેમ્પૂ અને કન્ડિશનરના ઉપયોગની સાથે હેર સીરમ વાપરવાનું ચલણ વધી રહ્યું છે. સીરમ વાળ ધોયા બાદ જ્યારે સંપૂર્ણ સુકાયા ન હોય એટલે કે વાળમાં પાણી કે ભેજનું પ્રમાણ હોય ત્યારે લગાવવામાં આવે છે. સીરમ એન્ટિઓક્સિડેન્ટથી ભરપૂર હોય છે. વાળને સુરક્ષા આપવાનું કામ સીરમ કરે છે. સીરમના લેયરને કારણે વાળ ક્ષતિગ્રસ્ત થતા અટકે છે. હેર સીરમ વાળમાં ફ્રિઝીનેસ આવી ગઈ હોય એટલે કે રુક્ષતા-બરછટપણું આવી ગયું હોય તેને દૂર કરવાનું કામ કરે છે. વાળને સિલ્કી બનાવે છે. મહત્ત્વની વાત એ છે કે સીરમ વાળના મૂળમાં નથી લગાવવાનું હોતું. વાળની લટ પર લગાવવાનું હોય છે. મોટા ભાગના હેર સીરમ પ્રવાહી સ્વરૂપમાં આવે છે.