રાજકાજ

દિલ્હીની ચૂંટણીનાં પરિણામોની સાઇડ ઇફેક્ટ્સ

- ચાણક્ય

દિલ્હી વિધાનસભાની ચૂંટણીમાં આમ આદમી પાર્ટીના પરાજય સાથે પરાજયનાં કારણો અંગે ચર્ચા ચાલી રહી છે ત્યારે આ પરાજયની રાજકીય ક્ષેત્રે અનેક પ્રકારની સાઇડ ઇફેક્ટ્સ જોવા મળી રહી છે. દિલ્હીમાં કોંગ્રેસ ઇન્ડિયા ગઠબંધનથી અલગ રહીને ચૂંટણી લડી રહી હતી. કોંગ્રેસને એક પણ બેઠક મળી નથી. આમછતાં કોંગ્રેસની છાવણીમાં કેજરીવાલના પરાજયની ખુશી જોવા મળી છે. દિલ્હીના નેતાઓ જાહેરમાં તેમની ખુશીને વ્યક્ત કરતા પણ જોવા મળ્યા.

ખુદ અરવિંદ કેજરીવાલના પરાજયને કોંગ્રેસે અને ખાસ કરીને સંદીપ દીક્ષિતે તેમનાં દિવંગત માતુશ્રી શિલા દીક્ષિતના પરાજયના બદલા તરીકે નિહાળ્યો છે. નવી દિલ્હીની બેઠક પર કેજરીવાલે શિલા દીક્ષિતને પરાજિત કર્યા હતા. આ વખતે કેજરીવાલ સામે સંદીપ દીક્ષિત પણ ઉમેદવાર હતા. તેઓ પરાજિત થયા છતાં કેજરીવાલનો પરાજય તેમને માટે ખુશીની વાત બની. કોંગ્રેસની ખુશીનું બીજું પણ એક કારણ પંજાબ પણ છે. કોંગ્રેસ હવે એવું માને છે કે પંજાબમાં અત્યારે સત્તામાં રહેલા આમ આદમી પાર્ટી અને ભગવંતસિંહ માન લાંબો સમય સત્તા ઉપર ટકી શકશે નહીં. માત્ર સત્તાને કારણે ટકી રહેલા આમ આદમી પાર્ટીના અનેક ધારાસભ્યો હવે પાર્ટી છોડવા માટે નવા વિકલ્પો શોધશે. પંજાબમાં અકાલી દળ વેરવિખેર અને નબળું છે, તેમ જ ભાજપ પણ સારી સ્થિતિમાં નથી.