સારાન્વેષ

સ્ટારલિન્કને આવકારો આપશો કે જાકારો?

- સ્પર્શે હાર્દિક

મૉડર્ન મનેખો મુક્ત રીતે હરતાં-ફરતાં સ્માર્ટફોનથી જે ટેલિકોમ સેવાઓનો ઉપભોગ કરે છે, એ સેવા ટાવરના ખૂંટે બંધાયેલી છે. ટાવર ના પકડાય તો માનવી ઓનલાઇન વિશ્વથી ડિસકનેક્ટ થઈ જાય, કૉલ-મેસેજ ના કરી શકે, જે વર્તમાન કાળમાં અનેકોને પોસાય એવું નથી. સતત કનેક્ટ તથા અવેલૅબલ રહેવું આજની પાયાની જરૂરિયાત છે. ટેલિકોમ ટૅક્નોલૉજીની ઉત્ક્રાંતિનો આગળનો તબક્કો એટલે કૅટેલાઇટથી ઇન્ટરનેટ-કૉલ-મેસેજ ઇત્યાદિ સેવાઓ ભોગવવી. આ ક્ષેત્રે અગ્રણી છે એલન મસ્કની કંપની ‘સ્પેસએક્સ' સર્જિત સ્ટારલિન્ક. એણે ભારતીયોને બે વર્ગમાં વિભાજિત કરી દીધા છે. એક વર્ગને એવી શંકા છે કે સ્ટારલિન્કથી રાષ્ટ્રીય સુરક્ષા સામે ખતરો ઊભો થશે. બીજો વર્ગ દુર્ગમ-છેવાડાના વિસ્તારો ઇન્ટરનેટથી વંચિત ન રહે, ઍડ્વાન્સ ટૅક્નોલૉજીનો ભારતીયોને અનુભવ મળે એવો મત વ્યક્ત કરી સ્ટારલિન્કને આવકારવા તત્પર છે.