અર્ચના દેસાઈ – વ્યાસ: એનર્જી ક્ષેત્રે પ્રવૃત્ત આ સફળ માનુનીની ઊર્જાનું નામ છે દઢ નિર્ધાર

કસદાર પગારવાળી નોકરી, દેશ-વિદેશના પ્રવાસ, પ્રેમાળ પતિ, વહાલસોયાં સંતાન... સુખની વ્યાખ્યામાં ફિટ થાય એવું બધું જ એમની પાસે હતું, પરંતુ એમણે આ બધાંથી સંતોષ માની લેવાને સ્વબળે પોતાની કંપની શરૂ કરનારાં આ મહિલાની કથની પ્રેરણાદાનધાન એવા અખાત દેશમાં છે.

- અલ્પા નિર્મલ

એક વ્યક્તિને આરામદાયક જિંદગી મળી જાય, સારો ખોરાક, જોઈતું મનોરંજન તથા સ્ટેબલ જૉબ મળી જાય એટલે એ પોતાનાં સપનાં, પોતાનું એમ્બિશન બારીની બહાર ફેંકી દે છે.

ટેસ્લા ઈલેક્ટ્રિક કાર તથા સ્પેસએક્સ જેવા પ્રોજેક્ટ્સને કારણે જાણીતા બનેલા અમેરિકાના ટોચના ઉદ્યોગપતિ એલન મસ્કનું આ બહુ જાણીતું વિધાન છેઃ કમ્ફર્ટ ઝોન ઈઝ વ્હેર ડ્રીમ્સ ગો ટુ ડાય... માણસ એક વાર સંતોષના સ્તરે પહોંચી જાય ત્યારે એનાં શમણાં મૃત્યુ પામે છે.

અબુ ધાબીસ્થિત કેમિકલ એન્જિનિયર અર્ચના દેસાઈ-વ્યાસની પણ આરામદાયક જિંદગી હતી. મલ્ટિનૅશનલ કંપનીમાં ઉચ્ચ હોદ્દો, અનેક દેશોમાં પ્રોજેક્ટ લીડર તરીકેનો અનુભવ, મોટા પગારની સિક્યોર્ડ નોકરી... બીજી કોઈ સ્ત્રી હોય તો વિચારે કે ઔર જીને કો ક્યા ચાહિયે?! પણ આ કમ્ફર્ટ ઝોન છોડીને અર્ચનાબહેન પોતાનું ડ્રીમ-પોતાનું મિશન પૂરું કરવા આદું ખાઈને લાગી પડ્યાં. નોકરિયાત બની રહેવાને બદલે બીજા માટે રોજગાર ઊભા કરવાના ધ્યેય સાથે એમણે કામ આદર્યું અને અનેક પડકાર વચ્ચે આ વર્ષે અબુ ધાબીમાં પેરામાઉન્ટ ટેક્નો-એન્જિનિયરિંગ કન્સલ્ટન્સી નામની કંપની શરૂ કરીને એ આન્ત્રપ્રેન્યૉર બન્યાં.

એક તો એન્જિનિયરિંગ જેવું પુરુષપ્રધાન કાર્યક્ષેત્ર. બીજું, સંયુક્ત આરબ અમીરાત (યુએઈ)નાં ઉચ્ચ અને સખત ધારા-ધોરણ. એ વચ્ચે પણ ૪૪ વર્ષનાં અર્ચનાબહેને ગુજરાતીઓના કૉલર ટાઈટ થાય એવું કાર્ય એકલપંડે કર્યું છે. પ્રિયદર્શિની સાથેની વાતચીતમાં અર્ચનાબહેન કહે છે: