નચાવો કાન તિરકીટ ધા

આદિ માનવ જંગલમાં રહેતો ત્યારે શિકાર કે રાની પશુના સગડ મેળવવા કાન સરવા કરી શકતો, પછી માનવી સુધરી ગયો એટલે કુદરતે એ શક્તિ પાછી ખેંચી લીધી

અમારા દૂરના એક બનેવી એમની આંખોની બન્ને કીકીઓ ત્રાંસી કરીને નાનાં છોકરાંવને બિવડાવતા. બીજાં એક ઓળખીતાં મામી એમની લાંબીલચક જીભને ખાંડવીના ફીંડલાની જેમ ગૂંચળે વાળી શકતાં. રાજકોટમાં એક છોકરાને પોતાના કાન નચાવતો અમે સગ્ગી આંખે જોયો છે.