મધુરી કોટક: પડદા પાછળના કલાકાર

નાની વયે પતિ ગુમાવી દેનારી સ્ત્રી તરીકે કોઈની સહાનુભૂતિ મેળવવાની હદે જવાને બદલે મધુબહેને ગજબ ખુમારી દાખવી અને જીવનના છેલ્લા શ્વાસ સુધી એ જાળવી રાખી

ઑપરેશન થિયેટરમાં ઍનેસ્થેટિસ્ટનું શું મૂલ્ય છે એની બહુ બધા લોકોને જાણ હોતી નથી. નાનપણમાં આપણને એમની ઓળખ માત્ર શીશી સૂંઘાડવાવાળા ડૉક્ટર તરીકે આપવામાં આવતી. ડૉક્ટર શીશી સૂંઘાડે અને થોડી વારમાં દરદી બેહોશ થઈ જાય.

દરદીને બેભાન કરવા માટેની એ શીશી હકીકતમાં તો ઑપરેશન વખતની પીડા ઓછી કરનારી દવા અને ઘણા કેસમાં એને નવજીવન આપનારી સંજીવની છે. ઑપરેશન પછી દરદી સાજોસારો થઈ જાય ત્યારે એને સંજીવનીનું મહત્ત્વ સમજાય છે. જો કે એ સંજીવની આપનારા ઍનેસ્થેટિસ્ટ એની સામે આવતા નથી. તબીબી ભાષામાં આ જ કારણે શીશી સૂંઘાડવાવાળા ડૉક્ટરને પડદા પાછળના કલાકાર તરીકે ઓળખવામાં આવે છે.