પ્રવાસ પૂરો થયો, પણ સત્તાની મંજિલ મળશે ખરી?

લોકસભાની આગામી ચૂંટણી પહેલાં રાહુલ ગાંધી વિપક્ષી આગેવાનોને એક નહીં કરી શકે તો એમની ‘ભારત જોડો યાત્રા’ એક નિરર્થક કવાયત બની રહેશે.

- હીરેન મહેતા

રાહુલ ગાંધીની પદયાત્રામાં લોકોની હાજરી તો સારી હતી, પણ..

છેક દક્ષિણના કન્યાકુમારીથી ઉત્તરે કશ્મીરના શ્રીનગર સુધીની કોંગ્રેસ નેતા રાહુલ ગાંધીની ભારત જોડો યાત્રા ઝાઝા કોઈ વિઘ્ન વિના પૂરી થઈ. ૧૩૪ દિવસના કુલ પ્રવાસમાં રાહુલ ગાંધીએ ૧૪ રાજ્યના ૭૫ જેટલા જિલ્લામાં પદયાત્રા કરી. વચ્ચે વચ્ચે કોંગ્રેસના બીજા આગેવાનો અને કેટલાક સાથી પક્ષના નેતાઓ પણ યાત્રામાં જોડાયા. યાત્રાનું નામ ભારત જોડો હતું, પણ એનો ઉદ્દેશ રાજકીય દૃષ્ટિએ સાવ જ હાંસિયામાં ધકેલાઈ ગયેલી કોંગ્રેસને ફરી બેઠી કરવાનો હોય એ સાહજિક છે.

કોંગ્રેસ પક્ષને વર્ષો પછી પહેલા બિન-ગાંધી પ્રમુખ આ જ ગાળામાં મળ્યા. જો કે નવા પ્રમુખની ચૂંટણી અગાઉ જે નાટક થયું એમાં પક્ષ માટે વધુ નીચાજોણું જ થયું હતું. અશોક ગેહલોતે પક્ષનું અધ્યક્ષસ્થાન સંભાળવાની તૈયારી દેખાડેલી, પણ એની પૂર્વશરત રૂપે રાજસ્થાનનું મુખ્ય પ્રધાનપદ છોડવાનો એમણે ધરાર નનૈયો ભણી દીધો. સોનિયા અને રાહુલ ગાંધી પાસે એમનો ઈનકાર સ્વીકારી લેવા સિવાય કોઈ વિકલ્પ નહોતો. કોંગ્રેસની સર્વોચ્ચ નેતાગીરી આટલી વામણી અગાઉ ક્યારેય નહોતી. છેવટે મલ્લિકાર્જુન ખરગે જેવા ઝાઝી રાષ્ટ્રીય ઓળખ ન ધરાવતા નેતાને પક્ષનું નેતૃત્વ સોંપવામાં આવ્યું. અલબત્ત, દરેક કોંગ્રેસી જાણે છે એમ, પક્ષમાં ધાર્યું હજી ગાંધીપરિવારનું જ થાય છે.