ડૉ. ભૈરવી જોશી: આ છે સાઈકલના પ્રેમમાં પડેલાં ડૉક્ટર

ગર્ભાવસ્થા દરમિયાન વજન બહુ વધી ગયું, એના ઈલાજ રૂપે એમણે જાતજાતના પ્રયોગ કર્યા, જેમાં એમને વધારે ફાવી ગયું સાઈકલિંગ. પછી તો એમની જિંદગી જ જાણે બે પૈડાં સાથે વણાઈ ગઈ. આ પ્રવૃત્તિને પ્રોત્સાહન આપતા સંગઠનની જવાબદારી સંભાળવા સાથે સુરત-વલસાડનાં આ ડેન્ટિસ્ટ બાળકોને સાહિત્ય તરફ વાળવાનું કામ પણ કરી રહ્યાં છે.

- અરવિંદ ગોંડલિયા

નામ એમનું ડૉ. ભૈરવી જોશી. વ્યવસાયથી તો એ દાંતનાં ડૉક્ટર છે. વલસાડ અને સુરત જિલ્લામાં ડેન્ટિસ્ટ તરીકે સારી ખ્યાતિ છે - વ્યવસાયથી તો એ દાંતનાં ડૉક્ટર એમની. જો કે એમની સાચી ઓળખ સાઈકલપ્રેમીની છે. સાઈકલ અવેરનેસ માટે એમના પગનાં પૈડાં સતત દોડતાં રહે છે. એમની આ પ્રવૃત્તિને ભારત સરકાર દ્વારા પણ બિરદાવવામાં આવી છે. એ નેધરલૅન્ડ્સ (હોલૅન્ડ)સ્થિત BYCS સંસ્થાના વલસાડનાં મેયર અને BYCS ઈન્ડિયા ફાઉન્ડેશનનાં ચીફ એક્ઝિક્યુટિવ ઑફિસર અને ડિરેક્ટર છે. આજે પ્રિયદર્શિનીને એ એમની સાઈકલની સફરે લઈ જવા તૈયાર છે.

મૂળ વલસાડનાં ભૈરવીનો જન્મ વડોદરામાં. પપ્પા અરુણભાઈ નાયક મિકેનિકલ એન્જિનિયર અને માતા ઉષાબહેન સરકારી હૉસ્પિટલમાં જનરલ ફિઝિશિયન. ભૈરવીનો સ્કૂલનો અભ્યાસ વડોદરાની ભારતીય વિદ્યા ભવનમાં. ભણવા સાથે એમણે કબડ્ડી, બાસ્કેટ બૉલ, સ્કેટિંગ, ડ્રામા, વગેરેમાં નિપુણતા કેળવી. ત્યાર બાદ જામનગરની ડેન્ટલ કૉલેજમાંથી બેચલર ઑફ ડેન્ટલ સર્જ્યન (BDS)ની ડિગ્રી મેળવી. એમાંય પીડિયાટ્રિક ડેન્ટિસ્ટ્રી વિષયમાં ઑલ ઈન્ડિયા લેવલ પર સૌથી વધુ માર્ક્સ (૭૨ ટકા) મેળવ્યા. વર્ષ ૧૯૯૮માં વલસાડના જાણીતા 8 ફિઝિશિયન ડૉ. કલ્પેશ જોશી સાથે લગ્ન થયાં. વર્ષ ૨૦૦૪ સુધી કસ્તુરબા હૉસ્પિટલમાં ડેન્ટિસ્ટ તરીકે કામ કર્યા પછી પોતાનું ધ્રુવી ડેન્ટલ ક્લિનિક ચાલુ કર્યું અને હવે ૨૦૧૯થી લોટસ ડેન્ટલ હૉસ્પિટલ ચલાવે છે..

આ તો છે એમની બાળપણની અને તબીબી લાઈફ, પણ ભૈરવીબહેનના જીવનમાં સાઈકલ કઈ રીતે પ્રવેશી એ જાણવું ઘણું રસપ્રદ છે.

બન્યું એવું કે ૨૦૧૦માં ભૈરવીબહેનની નાની દીકરી વૈશ્વીનો જન્મ થયો. એ ગાળામાં એમનું વજન પચાસથી વધી ૮૬ કિલો થઈ ગયું. વજન ઉતારવાના ઉપાય રૂપે વૉકિંગ, રનિંગ, સાઈકલિંગ, યોગ બધું થતું, પણ એમાં સાઈકલ એમને વધારે ફાવી ગઈ અથવા કહો કે ડૉ. ભૈરવી સાઈકલના પ્રેમમાં પડી ગયાં!