નાની નોટમાં હજી થાય છે મોટાં કામ!

દસની નોટમાં ભલે આખી ચા પણ મળતી ન હોય, પરંતુ ભરપેટ ભોજન કરી શકાય છે અને હા, નિદાન કરાવી દવા પણ મળી શકે છે.

- જયેશ દવે (ભાવનગર)

દસમાં શું થાય એટલે કે દસ રૂપિયાની એક નોટમાં શું થઈ શકે? સૌરાષ્ટ્રની વાત કરીએ તો હવે ચાના પણ ૧૨ રૂપિયા થઈ ગયા છે. ઘણાખરા પાનમસાલા તો ૧૫ રૂપિયાથી શરૂ થાય છે. વધતી જતી મોંઘવારીના સમયમાં ૧૦ રૂપિયાની નોટ પણ હવે દુબળી થઈ ગઈ છે. આમ છતાં ગોહિલવાડના ભાવનગરમાં આ જ ૧૦ની નોટમાં હજી પૂરો દમ છે અને આ એક નોટથી ભરપેટ ભોજન અને સારવાર પણ મેળવી શકાય છે.

અહીં વાત એવી ચાર સંસ્થાની કરવી છે જ્યાં ૧૦ રૂપિયાની તાકાત જેવી તેવી નથી.

સંતો અને સુરાની ભૂમિ ગણાતા ગુજરાત અને ખાસ કરી સૌરાષ્ટ્રની વાત કરીએ તો વીરપુર ખાતે જલારામ મંદિર હોય, સતાધાર ગીગા આપાની જગ્યા હોય કે બગદાણા બજરંગદાસ બાપાનો આશ્રમ હોય, આવી અનેક જગ્યાએ વિનામૂલ્યે ચાલતાં અન્નક્ષેત્રો ચાલે જ છે અને કોઈ જ સરકારી કાર્ડ કે સહાય વગર. ટીંબી સહિત અનેક સ્થળે વિનામૂલ્યે ઑપરેશન સહિતની સુવિધા આપતી અનેક હૉસ્પિટલ પણ છે જ. જો કે અહીં વાત વિનામૂલ્યની નહીં, પરંતુ જ્યાં મફતનું લીધાના ભાવ વગર પૂરા સમ્માન સાથે ભોજન કે પછી નિદાન મેળવી શકાય છે એની કરી છે.

ભાવનગર શહેરના જશોનાથ મહાદેવ સર્કલ પાસે આવેલું અન્નપૂર્ણા ભોજનાલય રૂપિયા ૧૦માં લોકોને ભરપેટ જમાડે છે. છેલ્લાં ૧૨ વર્ષથી અવિરત સવાર-સાંજ રોટલી, શાક, દાળ, ભાત અને છાશ અનલિમિટેડ.. અને એ પણ માત્ર રૂપિયા ૧૦માં જ. શું આમાં કોઈ મોંઘવારીની અસર જોવા એ નથી મળી? ચિત્રલેખાને જવાબ આપતા સંચાલક ગિરીશભાઈ શાહ કહે છે: ‘ઠાકોરજીની દયા છે. દસ રૂપિયામાં શરૂ કર્યું હતું અને આજે પણ એ જ રીતે જમાડીએ છીએ અને જમાડતાં રહીશું.’

આ ભોજનાલય માટે કોઈની પાસેથી દાન સ્વરૂપે એક રૂપિયો પણ લેવામાં આવતો નથી. ગિરીશભાઈ શાહ અને એમના પરિવાર દ્વારા આર્થિક અને શારીરિક સહયોગથી જ આ ચલાવવામાં આવે છે. કોરોના કાળ પૂર્વે અહીં રોજ એક ટંકમાં ૪૫૦થી વધુ વ્યક્તિઓ ભોજન લેતી હતી અને અત્યારે ૨૫૦થી વધુ લોકો સવાર-સાંજ ભોજન લેવા માટે અહીં આવે છે. વિદ્યાર્થીઓ, દવાખાને દરદીની સાથે આવેલાં સગાંસંબંધીઓ, ગામડેથી આવેલા નાના-મોટા વેપારીઓ સહિતના લોકો અહીં શુદ્ધ અને સાત્ત્વિક આહાર માટે આવતા હોય છે. અત્યાર સુધીમાં ૧૩ લાખ લોકોએ આનો લાભ લીધો છે.