મ્યુચ્યુઅલ ફંડ સહી હૈ.. સેબી ભી સહી હૈ!

મ્યુચ્યુઅલ ફંડ સંબંધી સેબીનાં પગલાં રોકાણકારોનાં હિત ઉપરાંત આ ઉદ્યોગનાં હિતમાં પણ છે. રોકાણકારો ગેરમાર્ગે ન દોરાય એ માટે સેબીએ શું કહ્યું અને શું કર્યું છે એ જાણીએ..

- જયેશ ચિતલિયા

મ્યુચ્યુઅલ ફંડની ચોક્કસ યોજનામાં રોકાણ કરવાથી પાંચ વરસમાં અમુક વળતર મળે છે, ૧૦ વરસ રોકાણ કરવાથી તમુક વળતર મળે છે અને ૨૦ વરસ રોકાણ કરવાથી તો આટલું બધું વળતર મળે છે. મ્યુચ્યુઅલ ફંડના એસઆઈપી (સિસ્ટેમેટિક ઈન્વેસ્ટમેન્ટ પ્લાન)માં નિયમિત ઈન્વેસ્ટમેન્ટ કરવાથી પાંચ, દસ અને વીસ વરસે તમારી મૂડી વધીને અમુક લાખ કે અમુક કરોડ પર પહોંચી શકે છે આવી જાહેરખબરો અને પ્રચાર સામગ્રી-સાહિત્ય વિવિધ મ્યુચ્યુઅલ ફંડ તરફથી અથવા એમના વતી પ્રસિદ્ધ થતા હોય છે, જેમાં આંકડા પણ અપાયા હોય છે.

આ યોજનાઓ સાચી અને આંકડા પણ સાચા હોય છે, પરંતુ એ કાં ધારણા આધારિત હોય છે અથવા સંબંધિત મ્યુચ્યુઅલ ફંડની જે-તે સ્કીમની ભૂતકાળની કામગીરી આધારિત હોય છે. આ જ કારણે ફંડ હાઉસ એમાં નીચે બારીક અક્ષરોથી એમ પણ લખે છે કે ફંડની યા સ્કીમની ભૂતકાળની કામગીરી એ ભાવિ કામગીરીની ખાતરી આપતી નથી અર્થાત્ સરળ અને સ્પષ્ટ શબ્દોમાં અત્યાર સુધી ચોક્કસ ટકા વળતર આપ્યું છે એનો અર્થ એ ન થાય કે એ ભવિષ્યમાં પણ સમાન વળતર આપશે જ, પણ આ ઝીણા અક્ષર વાંચે કેટલા અને સમજે કેટલા? ફંડની બોલકી જાહેરખબરોમાં પણ આવું ખાતરી સંબંધી વાક્ય એટલું ઝડપથી બોલાય છે કે સાંભળે કેટલા અને સમજે કેટલા?

વળતરના દાવા નહીં કરો..