મોદીની અમેરિકા મુલાકાતઃ જગત જમાદારનું ગણિત શું છે?

મોદીના આવકાર માટે અમેરિકામાં થનગનાટ.

બહુ ઓછા રાજનેતાઓને મળ્યું હોય એવું બહુમાન વડા પ્રધાન નરેન્દ્ર મોદીને એમની અમેરિકા મુલાકાત દરમિયાન મળવાનું છે. એક તો અમેરિકાએ મોદીને એના મહેમાન તરીકે (સ્ટેટ વિઝિટ પર) તેડાવ્યા. બીજું, તાજેતરનાં વર્ષોમાં મોદી વિશ્વના એવા બીજા આગેવાન છે, જેમને અમેરિકન સંસદનાં બન્ને ગૃહોની સંયુક્ત બેઠકને બીજી વાર સંબોધવાનો અવસર સાંપડ્યો છે.

ચિત્રલેખાનો આ અંક પ્રગટ થશે ત્યાં સુધીમાં મોદીનો અમેરિકાપ્રવાસ પૂરો થવામાં હશે. જો કે એની ચર્ચા ઘણા દિવસો સુધી રાજદ્વારી વર્તુળોમાં ગાજતી રહેશે. મોદીએ અંગત રીતે તો વિશ્વના લગભગ તમામ આગેવાનો સાથે સારાસારી કેળવી છે. સામાન્ય રીતે કોઈ બે દેશના પ્રમુખ કે વડા પ્રધાન મળે ત્યારે હસ્તધૂનનથી માંડી ફોટોગ્રાફ પડાવવા સુધીની વિધિવત્ પ્રક્રિયા તદ્દન શુષ્ક રહેતી હોય છે, પણ આવી ઔપચારિક વિધિઓને પણ અત્યંત ઉષ્માભરી ક્ષણોમાં ફેરવી નાખવાની મોદીની કુશળતા આપણે અનેક વાર નજરે નિહાળી છે. દુનિયાઆખીના ટીવી-કૅમેરા આંખ સામે મંડાયા હોય ત્યારે રાજકીય શિષ્ટાચાર પડતો મૂકી બીજા દેશના નેતાને કોઈ સામે ચાલીને ભેટે કે પગે સુદ્ધાં લાગે એવું મોદીના કિસ્સામાં એકથી વધુ વખત બન્યું છે.

રાજદ્વારી સંબંધો ભલે પડદા પાછળની ગણતરીથી વધુ પ્રભાવિત થતા હોય, લોકોની નજરે પડતી ગિતિવિધમાં મોદી આવી ગણતરીથી ઘણે ઉપર પહોંચ્યા છે એ હકીકત તો એમના કટ્ટર વિરોધીઓ કે ટીકાકારોએ પણ સ્વીકારવી પડે એમ છે.