સ્ત્રી સામે સ્ત્રીને ઊભી કરી વધુ ઈજ્જત ન કાઢો..

મણિપુરમાં ચાલી રહેલી હિંસા રોકવા પગલાં લેવાને બદલે ભાજપ સરકારે એને કોંગ્રેસ શાસિત રાજ્યોમાં સ્ત્રીદમનના કિસ્સા સાથે સરખાવી સંતોષ ભલે મેળવ્યો હોય, પણ હિસાબ બરાબર કરવાની આ રીત તદ્દન અનુચિત છે.

- હીરેન મહેતા

ન્યાય અને નારીસમ્માનની વાત બધાને કરવી છે, પણ હિંસા અટકાવવાની સમજણ કોણ દાખવશે એ પ્રશ્ન છે.

ન બોલવામાં નવ ગુણ.. એ ઉક્તિ સાંભળવામાં કદાચ સારી લાગતી હશે, પરંતુ દરેક વખતે એનો અમલ સાચો હોય એ જરૂરી નથી. મણિપુરની કોમી હિંસાના મામલે રાજ્ય અને કેન્દ્ર સરકારે અઢી મહિના કરતાં વધુ સમય મૌન પાળ્યું, એનું પરિણામ અત્યારે બધાની સામે છે. ન એક નિવેદન, ન એકેય પગલું. વિવાદ બહુ વધી પડ્યો ત્યારે વડા પ્રધાન નરેન્દ્ર મોદીએ સંસદ ભવનની બહાર મણિપુરમાં બે મહિલાઓને ભરરસ્તે નિર્વસ્ત્ર અવસ્થામાં ફેરવવાના કિસ્સાના આરોપીઓ સામે જલદ કારવાઈની ખાતરી આપી. જો કે વડા પ્રધાન આ મુદ્દે સંસદમાં એક હરફ સુદ્ધાં ઉચ્ચારવા તૈયાર નથી અને આખો મામલો ત્યાં જ આવી અટક્યો છે. શાસક અને વિરોધ પક્ષ, બન્ને મમતે ચડ્યા છે અને રાબેતા મુજબ, આને પ્રતિષ્ઠાનો પ્રશ્ન બનાવી લોકસભા અને રાજ્યસભાની કાર્યવાહી સ્થગિત કરવાની ફરજ પાડવામાં આવી છે.

સોમવાર, ૨૪ જુલાઈની બપોરે આ લખાઈ રહ્યું છે ત્યારે સંસદનાં બન્ને ગૃહોની બેઠક વધુ એક દિવસ માટે મુલતવી રાખવી પડી છે. સંસદમાં અર્થસભર ચર્ચા હવે આમેય ભાગ્યે જ થાય છે. જો કે મણિપુરનો મામલો અતિ ગંભીર અને સંવેદનશીલ છે. રાજ્યની વડી અદાલતના એક આદેશને પગલે મે મહિનાની શરૂઆતમાં મણિપુરમાં મૈતી (મેતેઈ) અને કુકી પ્રજા વચ્ચે લોહિયાળ સંઘર્ષ ફાટી નીકળ્યો અને એના બીજા જ દિવસે કુકી સમાજની બે મહિલાઓનાં અપહરણ કરી એમને નિર્વસ્ત્ર કરી ગામમાં ફેરવવામાં આવી અને એ પછી એક સ્ત્રી પર બળાત્કાર થયો.