એક માનામાં એને જબાન નહોતી...આજે એ લોકોને બોલતા ડરે છે!

સૌરાષ્ટ્રના ગામડાની એક અતિ ગભરુ યુવતી. કોઈની સામે એની જીભ ન ઊપડે. વર્ષો સુધી ક્યાંય એકલી ગઈ સુદ્ધાં નહોતી. લગ્ન પછી પરિવારથી સેંકડો માઈલ દૂર જવું પડ્યું એ પછી ‘કોઈ પણ સંજોગમાં જીવતાં શીખવું પડશે’ એ હકીકતે એને જાણે બોલતી કરી... અને આજે ૩૦ વર્ષે એક ખ્યાતનામ ઈન્ટરનૅશનલ ટ્રાન્સફોર્મેશનલ કોચ તરીકે એ દેશ-વિદેશના લોકોને શિક્ષણ કે વ્યાવસાયિક ક્ષેત્રે આગળ આવવામાં મદદ કરે છે.

- નિશા બુટાણી

સૌરાષ્ટ્રમાં જૂનાગઢ પાસે આવેલા શાપુર ગામના ખેડૂતપરિવારની આ છોકરી નાનપણથી જ શરમાળ. એક સમયે એને એકલી ઘરની બહાર નીકળવા પર પરિવારની કેટલીક મર્યાદા હતી. રૂઢિચુસ્ત વાતાવરણમાં ઊછરેલી આ દીકરીનાં ૨૧ વર્ષે લગ્ન થયાં અને જાણે એને પાંખ આવી. લગ્નના વીસમે દિવસે એ થાઈલૅન્ડ જઈને વસી.

જોતજોતાંમાં સમય બદલાયો. આજે એ મહિલા ઈન્ટરનૅશનલ બિઝનેસ કોચ તરીકેની ઓળખ સાથે દેશ-વિદેશમાં ઘૂમી રહી છે. ૩૭ દેશોની સફર એના પાસપોર્ટ પર બોલે છે. આજે એના નામની આગળ ઈન્ટરનૅશનલ બિઝનેસ વુમન કોચ, મોટિવેશનલ સ્પીકર, યુટ્યૂબર, વુમન આન્ત્રપ્રેન્યાર, સોશિયલ મિડિયા ઍન્કર... જેવાં અનેક વિશેષણ લાગી રહ્યાં છે અને એ મહિલા સશક્તિકરણનું એક પ્રેરણારૂપ ઉદાહરણ બની છે.

નામ છે એનું નિશા બુટાણી. સૌરાષ્ટ્રના કડવા પટેલ સમાજની આ મહિલાને આજે દેશ-વિદેશના લોકો ઓળખે છે. ખાસ તો ઈન્ટરનૅશનલ બિઝનેસ કમ્યુનિટીમાં આ નામ જાણીતું છે.

એનો પરિચય મેળવવા સમયના કાંટા ૩૦ વર્ષ પાછળ લઈ જઈએ. હા, વાત છે ત્રણ દાયકા પહેલાંની. થાઈલૅન્ડની રાજધાની બેંગકોકના એક શૉપિંગ મૉલમાં સૌરાષ્ટ્રની આ દીકરી કોઈ ભારતીય સામે મળે તો ઔચિત્ય ખાતર પણ એની સાથે વાત ન કરવી પડે એટલે કોઈ આડશની પાછળ ઊભી રહી જતી. હજી નવી નવી પરણીને અહીં આવેલી એ યુવતી અગાઉ ક્યારેય જૂનાગઢથી એકલી મુંબઈ પણ ગઈ નહોતી. સ્વાભાવિક છે કે ૨૧ વર્ષની આ યુવતીને થાઈલૅન્ડ જેવા દેશમાં કોની સાથે કેવી રીતે અને કઈ ભાષામાં વાત કરવી એની ખબર નહોતી.

નિશાના પિતા ગોકળભાઈ ફળદુ અગાઉ જૂનાગઢ નજીક શાપુર ગામમાં ખેતીકામ કરતા હતા. પછી જૂનાગઢમાં કાપડની દુકાન શરૂ કરી હતી. એક મિડલ ક્લાસ પરિવારમાં ઊછરેલી આ યુવતી ક્યાંક ઘરની બહાર જાય તો પણ પરિવારની મહિલાઓ સાથે જતી હતી. સૌરાષ્ટ્રના મોટા ભાગના પરિવારોમાં ત્રણ દાયકા પહેલાં આવી મર્યાદા હોવી એ સ્વાભાવિક હતું. જો કે નિશા ફળદુમાંથી નિશા બુટાણી બન્યા બાદ એના જીવનમાં મોટું પરિવર્તન આવ્યું. જે નવી સ્થિતિ નિર્માણ થઈ એમાં નિરાશ થવાને બદલે હિમ્મતથી સંઘર્ષ કર્યો તો સફળતા મળતી ગઈ.