ખાનગી શાળાઓને હંફાવે છે આ સરકારી શિક્ષણ...

હમ ભી હૈ જોશ મેં... સ્માર્ટ ક્લાસ, કમ્પ્યુટર લૅબ, રમવા માટે મેદાન... આ બધી અદ્યતન સુવિધા સાથે મૂલ્યનિષ્ઠ શિક્ષણ સરકારી શાળાની સૂરત બદલી રહ્યું છે. સુરતની ડઝનેક આવી શાળાઓમાં પ્રવેશ મેળવવા લાંબી લાઈનો લાગે છે અને છેવટે હજારો વિદ્યાર્થીઓ પ્રવેશથી વંચિત પણ રહી જાય છે.

- અરવિંદ ગોંડલિયા (સુરત)

ચાલો, આજે ડ્રો છે. મારા દીકરાનું નામ આવી જાય તો ભગવાનનો આભાર. પછી એના ભવિષ્યની ચિંતા નહીં રહે...

અહીં કોઈ આર્થિક લાભ કે ચીજવસ્તુનો ડ્રો નથી થઈ રહ્યો. આ ડ્રો સ્કૂલ ઍડ્મિશન માટેનો છે. સામાન્ય રીતે બાળકોનાં ઉજ્જ્વળ ભવિષ્ય માટે વાલીઓ ખાનગી શાળામાં ઍડ્મિશન ઝંખતા હોય છે, પરંતુ સુરતમાં તો કેટલીક સરકારી શાળામાં પ્રવેશ માટે રીતસર પડાપડી થાય છે. એનું કારણ એ છે કે શ્રેષ્ઠ શિક્ષણ અને અદ્યતન સુવિધામાં ખાનગી શાળાની બરોબરીમાં ઊભી રહેવા સુરતની કેટલીક સરકારી પ્રાથમિક શાળા સક્ષમ બની છે.

સુરતના ઉત્રાણ વિસ્તારમાં આવેલી સુરત મહાનગરપાલિકા સંચાલિત એક જ કૅમ્પસમાં ચાલતી ત્રણ પ્રાથમિક શાળા મહારાજા કૃષ્ણકુમારસિંહજી, પ્રમુખ સ્વામી મહારાજ અને લતા મંગેશકર શાળાની વાત કરીએ તો ગયા મહિને અહીં ઍડ્મિશન પ્રક્રિયા શરૂ થઈ ને ત્રણેક દિવસમાં પૂરી પણ થઈ ગઈ. આ ત્રણ શાળામાં કુલ ૩૫૦૦ વિદ્યાર્થીઓની ક્ષમતા સામે દર વર્ષે બેથી ત્રણ હજારનું તો વેઈટિંગ લિસ્ટ હોય છે. એટલે જ અહીં વહેલા તે પહેલાના ધોરણે નહીં, પણ ડ્રો સિસ્ટમથી વિદ્યાર્થીને પ્રવેશ મળે છે. એ અગાઉ પ્રવેશ ફૉર્મ ભરવા માટે શાળામાં લાંબી લાઈન લાગે છે. ડૉક્ટર, એન્જિનિયર, શિક્ષક, વેપારી અને ઉદ્યોગપતિઓનાં સંતાનો પણ અહીં અભ્યાસ કરે છે.

એવું તે શું છે આ સરકારી શાળામાં કે મધ્યમ તો છોડો, અમીર વર્ગના વાલીઓ પણ અહીં ઍડ્મિશન લેવા ઉતાવળા રહે છે?

વિજય ઝાંઝરૂકિયા