અનેક અવરોધ છે તો ઉપાય પણ છે જ...

‘આયેગા તો મોદી હી’ આખરે સત્ય સાબિત થયું, વડા પ્રધાનની સોગંદવિધિ થઈ ગઈ અને પ્રધાનો વચ્ચે ખાતાંની વહેંચણી પણ થઈ ગઈ, પરંતુ શું મોદી સરકાર એની આગલી ટર્મ જેવાં જોશપૂર્વક કામ કરી શકશે યા ટેકાવાળી સરકારને એ રીતે કામ કરવા મળશે? હા, મોદી સરકાર માટે સંકેત તો સારા મળી રહ્યા છે.

- જયેશ ચિતલિયા

મોદી સરકાર ત્રીજી વાર સત્તા પર આવી તો ગઈ, પરંતુ એમને આ વખતે આર્થિક સુધારા કરવામાં અડચણ આવશે, ઘણાં સમાધાન કરવાં પડશે, જેને પરિણામે આર્થિક વિકાસને અસર થશે, વિકાસ ધીમો પડી શકે, મોદીના ઘણા બોલ્ડ નિર્ણય અટકી શકે યા લંબાઈ જઈ શકે...

આવી શંકા અને ભય હજી પણ લોકોનાં મનમાં રમી-ભમી રહ્યાં છે. આવી વાત પણ ફેલાવવામાં આવી રહી છે. જો કે ઈતિહાસ કહે છે કે આટલા બધા સંદેહ કરવાની જરૂર નથી. અલબત્ત, મોદી સરકાર સામે પડકારો વધી ગયા છે, પણ મોદી સરકાર આ પડકારોને પહોંચી વળવા સક્ષમ છે એવો વ્યાપક મત પણ વ્યક્ત થાય છે. અલબત્ત, એનાં વાજબી કારણ હાજર છે.

આ પાંચ વરસ વધુ બહેતર બનશે...

મોદી સરકાર માટે આ પાંચ વરસ ભલે વધુ પડકારભર્યાં રહ્યાં, પણ આ પાંચ વરસમાં મોદી સરકારની કામગીરી વધુ બહેતર બનશે, આ ચૂંટણીનાં પરિણામમાંથી જે બોધપાઠ અને સંદેશ બહાર આવ્યા છે એ વિચારપ્રેરક અને સંવેદનશીલ છે, જે મોદી સરકાર માટે બહુ અગત્યનાં માર્ગરેખા-માર્ગદર્શક પણ બનશે. મોદી સરકારની સક્ષમતા સ્ટ્રેટેજીને જોઈએ તો મોદી સરકારે પ્રથમ ૧૦૦ દિવસનાં કાર્યોની યાદી તૈયાર કરી દીધી છે.