સંબંધ, સહવાસ અને સ્વાસ્થ્ય

કંકોતરીનો કાર્ડિયોગ્રામ ભારતમાં લગ્નની પ્રથા બહુ મજબૂત છે અને એની પારિવારિક વ્યવસ્થાની તંદુરસ્તીનું રહસ્ય એ જ છે. અમેરિકામાં પરિવારો તૂટી રહ્યા છે, કારણ કે ત્યાં લોકો એકલવાદી છે. આપણે સમૂહવાદી છીએ એટલે સંયુક્ત કુટુંબવ્યવસ્થા ટકી રહી છે.અમેરિકાના ડાહ્યા લોકો એટલે જ ભારત જેવા પૂર્વી દેશોની સામાજિક વ્યવસ્થાનાં ગુણગાન ગાઈ રહ્યા છે.

- રાજ ગોસ્વામી

પ્રશંસાનું સુખ...

ઋષિ અને રંજીતાનાં લગ્નને ૧૦ વર્ષ થઈ ગયાં હતાં. એક દિવસ સૂતાં પહેલાં ઋષિએ રંજીતા તરફ જોઈને કહ્યું: ‘કોણે કહ્યું કે તારા આકાશમાં જ ચમકે છે!'

રંજીતા શરમથી લાલ થઈ ગઈ.

બીજા દિવસે બ્રેકફાસ્ટ પર ઋષિએ કહ્યું: ‘સૅન્ડવિચ કરતાં વધુ સરસ સુગંધ તારી આવે છે.’ રંજીતા હસી પડી અને બોલીઃ ‘આજકાલ બહુ રોમેન્ટિક થઈ ગયો છે ને કંઈ!’

ઋષિ હસ્યો અને રંજીતાના કપાળ પર કિસ કરીને ઑફિસ ગયો.

થોડા દિવસ આવો જ સિલસિલો ચાલ્યો. એક દિવસ રંજીતા કિટી પાર્ટીમાં ગઈ. ત્યાં એની એક સખી ફરિયાદ કરતી હતી કે એનો પતિ અચાનક જ એનાં વધુપડતાં વખાણ કરવા લાગ્યો છે, પણ એમાં એની ગિલ્ટ છે. એને ઑફિસમાં કોઈની સાથે ચક્કર ચાલે છે.

રંજીતા ચિંતામાં પડી ગઈ. એ રાતે ઋષિએ આદતવશ પૂછ્યું પણ ખરું કે આજે ચહેરો તારો કેમ ઝાંખો છે, પણ રંજીતાએ વાત ઉડાવી દીધી.

એ રાતે ઋષિ ઊંઘી ગયો એટલે રંજીતાએ ઋષિનું વૉલેટ તપાસ્યું. કશું ન મળ્યું. પછી ઑફિસબૅગ ફંફોસી. એમાં લૅપટૉપની બાજુમાંથી એક નાનકડું પુસ્તક મળી આવ્યું. એનું ટાઈટલ હતુંઃ હેપ્પી મૅરેજ, હેલ્થી લાઈફ.

પુસ્તકનું પહેલું પ્રકરણ હતુંઃ જીવનસાથીની પ્રશંસા કરો.

રંજીતાએ પુસ્તક વડે કપાળ ફૂટ્યું અને બોલીઃ ‘હું કેવી ડફોળ છું!’

બીજા દિવસે ઋષિ કશું બોલે એ પહેલાં રંજીતા બોલીઃ ‘આજકાલ બહુ હૅન્ડસમ થતો જાય છે ને કંઈ, ઑફિસમાં વીજળીઓ પડવાની છે!'

ઋષિ હસ્યો અને બોલ્યોઃ ‘એ ચોપડી મસ્ત છે!’

***

આમ તો આ પુસ્તક અમેરિકન લોકો માટે છે, પણ આપણે અમે તમને કે’તા’તા ને! એવો આનંદ લેવા માટે પણ એક વાર નજર નાખવા જેવું છે. હજી ગયા ફેબ્રુઆરીમાં જ પ્રગટ થયું છે અને અમેરિકામાં એની ઘણી ચર્ચા છે. એનું શીર્ષક સકારાત્મક રીતે ઉશ્કેરણીજનક છેઃ પરણી જાવઃ શા માટે અમેરિકનોએ માતબર લોકોની અવજ્ઞા કરવી જોઈએ, મજબૂત પરિવારો ઘડવા જોઈએ અને સભ્યતાને બચાવવી જોઈએ (Get Married: Why Americans Must Defy the Elites, Forge Strong Families, and Save Civilization).