એમની સાંખોનું નિશાન છે, ત્રીજી આંખ

આજની મહિલા વિવિધ ક્ષેત્ર સર કરી રહી છે ત્યારે સીસીટીવી સિક્યોરિટી સિસ્ટમ જેવા ટેક્નિકલ ફીલ્ડમાં ડિજિટલ છલાંગ ભરી રહેલાં સુરતનાં આ સન્નારી અનેક સ્ત્રીઓ માટે પ્રેરક બન્યાં છે. પ્રસ્તુત છે એક નારીની નવલી બિઝનેસ ગાથા.

- અરવિંદ ગોંડલિયા

સમંદરમાં સમાતાં પહેલાં સૂરજ પોતાના તેજને સંપૂર્ણપણે પ્રગટાવી ચૂક્યો હતો. આકાશ પણ એના તાલે તાલ મિલાવી ઝડપથી રંગ-પરિવર્તન કરી રહ્યું હતું. એને પણ અંધકારમાં ઓઝલ થવાની હોંશ હતી ને! ડૂબી રહેલા સૂરજની ઝાંય સમંદરનાં નીલા પાણીમાં ઘૂંટાઈ રહી હતી...

આ મનભાવન દશ્યને ધરા સાક્ષીભાવે જોઈ રહી. થોડી થોડી વારે હવાની હળવી લહેરખી આવીને ધરાના ચહેરા પરની લટોને રમાડી જતી હતી. ધરાએ બેધ્યાનપણે પોતાના વાળ સંકોર્યા અને આથમતા સૂરજને ફરીથી નિહાળવા લાગી. પાણીમાંથી પરિવર્તિત થતાં કિરણોનું તેજ એની આંખોની ચમકને ઔર પ્રજ્વલ કરતું હતું...

આટલી શબ્દાવલી જોઈને અનુમાન લગાવી શકાય છે કે આજે પ્રિયદર્શિનીમાં કોઈ લેખિકાને મળવાનું છે અને આ અનુમાન સાવ ખોટું પણ નથી. જો કે વાર્તા લખવી એ એમનો શોખ માત્ર છે. એમનું લક્ષ્ય તો એક જ છેઃ ત્રીજી આંખ. જી હાં, ત્રીજી આંખ એટલે કે સીસીટીવી કૅમેરાનો બિઝનેસ. આ ક્ષેત્રમાં બહુ ઓછી સ્ત્રી સક્રિય છે ત્યારે સુરતની એક મહિલાએ આ ફીલ્ડમાં એક જ વર્ષમાં મોટો મુકામ હાંસલ કર્યો છે. તદ્દન અનોખા ક્ષેત્રમાં સફળતાની ધજા લહેરાવનારાં આ મહિલા છે આપણા આ વખતનાં પ્રિયદર્શિની નેહા દસાડિયા.