અક્ષમતા પુરવાર કરો ને બનો આઈએએસ!

મહારાષ્ટ્રની આ ‘ગરીબ’ યુવતી બોગસ સર્ટિફિકેટ આપીને સરકારી ઑફિસર બની બેઠી હોવાની બબાલ જામી છે.

- સમીર પાલેજા (મુંબઈ)

રાજસ્થાનના કોટા શહેરમાં વર્ષે કેટલાય છાત્રો યુપીએસસી કે બીજી સ્પર્ધાત્મક પરીક્ષા પાસ ન કરી શકતાં આત્મહત્યાનું પગલું લે છે. આઈએએસને જ જીવન સર્વસ્વ માની લેવાના આ ક્રેઝ પર કંઈકેટલી વેબ-સિરીઝ પણ બની છે.

આમ જુઓ તો મેડિકલ એન્ટ્રન્સની જેમ યુપીએસસીનાં પેપર લીકના દાખલા નથી, પણ નીચલી રૅન્કના ઉમેદવારો ખોટાં સર્ટિફિકેટ આપીને આઈએએસ ફૅડર પડાવી લે એવા ઘણા કેસ છે. તાજો દાખલો છે મહારાષ્ટ્રની પૂજા ખેડકરનો.

પૂજા ૨૦૨૨-૨૦૨૩ની આઈએએસ છે. એને તાલીમાર્થી તરીકે પુણેમાં પોસ્ટિંગ મળેલું. આ છોકરીએ પોતાની ખાનગી આઉડી કાર પર મહારાષ્ટ્ર સરકાર લખી નાખ્યું, છાપરા પર લાલ-બ્લુ બત્તી અને ગાડીની આગળ-પાછળ વીઆઈપી નંબર પ્લેટ લગાડી દીધી.

પૂજા ખેડકર: આઉડી કાર અને પુણેનો બંગલો મારી ગરીબીની સાબિતી છે!

સ્થાનિક આરટીઆઈ ઍક્ટિવિસ્ટ વિજય કુંભારની ખણખોદથી જણાયું કે પરીક્ષામાં પૂજાએ ઈડબ્લ્યુએસ (આર્થિક રીતે પછાત વર્ગ) તથા ડિસેબિલિટી સર્ટિફિકેટ રજૂ કરીને રૅન્ક કુદાવી દીધી અને આઈએએસ બની બેઠી.