ગુતાલ ગામની સિકલ બદલી સરકારી શાળાએ

સર્જક સાથે સંવાદ: પુસ્તકમાં ભણાવાતી કૃતિના લેખક સાથે વિદ્યાર્થીઓની વાતચીત.

-  અરવિંદ ગોંડલિયા (સુરત) । જયેશ દવે (ભાવનગર) । નિતુલ ગજ્જર (વડોદરા) । મહેશ શાહ (અમદાવાદ)

ગુતાલ... ખેડા જિલ્લામાં નડિયાદથી પાંચેક કિલોમીટર દૂર આવેલું આ ગામ બેએક દાયકા પહેલાં દેશી દારૂ ગાળવાના ધંધા માટે કુખ્યાત હતું. સમય જતાં સરકાર અને સમાજના સહયોગથી દારૂની બદી ધીરે ધીરે દૂર થઈ. પાછલા દાયકામાં ગામની સરકારી શાળાએ પણ મહત્ત્વની ભૂમિકા ભજવી.

અંદાજે છ હજારની જનસંખ્યા ધરાવતા આ ગામમાં બહુધા વસતિ તળપદા (દેવીપૂજક) સમાજની. સાથે પાટીદાર, ક્ષત્રિય, બારૈયા, વગેરે લોકો રહે. મુખ્ય વ્યવસાય ખેતી અને પશુપાલન. અહીં આંગણવાડી, પ્રાથમિક આરોગ્ય કેન્દ્ર, દૂધમંડળી, પ્રાથમિક શાળા, વગેરે છે. હાઈ સ્કૂલ નહોતી ત્યારે ગામના છોકરા નજીકના ઉત્તરસંડા ગામની હાઈ સ્કૂલમાં ભણવા જતા, પરંતુ છોકરીને ઘરથી દૂર ભણવા મોકલવાના બદલે એને સ્કૂલમાંથી ઉઠાડી લેવામાં આવતી.

૨૦૧૧માં ગામમાં સરકારી માધ્યમિક શાળા બની એટલે છોકરીઓ ઘરઆંગણે ભણતી થઈ. વળી, શાળા થકી ગામની ઓળખ પણ બદલાઈ. એના મૂળમાં છે શાળામાં યોજાતી શૈક્ષણિક અને ઈતર પ્રવૃત્તિ. આચાર્ય સહિત છ શિક્ષકનો સ્ટાફ ધરાવતી આ શાળામાં હાલ ૧૨૧ છોકરા-છોકરી ભણે છે ને એમાં પાંચેક હજાર પુસ્તકની લાઈબ્રેરી છે.