કરપીણ, દયનીય, અમાનવીય

ખબર નહોતી કે આપસમાં લડ્યા કરશું ને આખરમાં આ તારું, મારું, સહિયારું બધું આમ જ વીતી જાશે.

- હિતેન આનંદપરા

કાળક્રમે યુદ્ધો ખેલાતાં રહ્યાં છે. ઈતિહાસના ગ્રંથોમાં મોરપીંછને થોડા મહિના મૂકી રાખીએ તો એ પણ રક્તરંજિત દેખાવા માંડે એવી યાદી છે. આમ તો પ્રકૃતિનું કામ સર્જન-વિસર્જનનું છે, પણ માણસે વિસર્જન વિભાગનો મોટો અંકુશ પોતાના તાબામાં લઈ લીધો છે.

આપણી નજર સામે વિભીષિકાનો-ભયનો માહોલ વિસ્તરી રહ્યો છે. રશિયા-યુક્રેનના યુદ્ધમાં યુક્રેને અંદાજે સિત્તેર હજારથી વધુ મૃત્યુ ઝેલવાં પડ્યાં છે તો રશિયાએ ગુમાવેલા લોકોનો આંકડો સવા લાખ સુધી પહોંચવા આવ્યો છે. ઈઝરાયલ અને હમાના યુદ્ધમાં ઈઝરાયલે અંદાજે પંદરસો લોકોની જાનહાનિ સ્વીકારી છે તો સામે પેલેસ્ટિનનું રજિસ્ટર ચાલીસ હજારથી વધારે મૃત્યુ નોંધી ચૂક્યું છે. ઈરાનની દોરવણી હેઠળ લેબેનનના આતંકી સંગઠન હિઝબુલ્લા અને ઈઝરાયલ વચ્ચેનું યુદ્ધ વિસ્તરતું જાય છે.