સહાનુભૂતિની પાઠશાળા બીજાના પેંગડામાં પગ ઘાલવો

સંવેદના વ્યક્તિને એની સાથેના પ્રત્યેક માણસ સાથે એક સાર્થક અને વિશ્વાસનો સંબંધ સ્થાપિત કરવામાં મદદ કરે છે. માણસો હોય ત્યાં ગેરસમજ, નારાજગી, ટકરાવ થવાં સહજ છે. એ વખતે જવાબદાર વ્યક્તિ તરીકે તમારે દરેકનાં વિચાર અને લાગણીને સમજીને સંબંધોની નૌકા તોફાનમાં ઊંધી ન વળી જાય એ જોવું પડે. એનું નામ જ સંવેદનશીલ નેતૃત્વ.

- રાજ ગોસ્વામી

ક્ષમતા મુજબ યોગદાન...

એક યુવાન રોજ દરિયાકિનારેથી પસાર થાય. એક દિવસ એણે જોયું કે દરિયાની ભરતીમાં અસંખ્ય માછલી કિનારા પર રેતીમાં ફેંકાઈને તરફડતી હતી અને એક વયોવૃદ્ધ માણસ એક પછી એક માછલીને ઊંચકીને પાછી દરિયામાં ફેંકતો હતો.

યુવાન એની નજીક ગયો અને બોલ્યોઃ ‘વડીલ, એકસાથે આટલી બધી માછલી પાણી બહાર આવી ગઈ છે. તમે એક-એક કરીને એને પાછી પાણીમાં ફેંકશો તો એનાથી કોઈ ફરક નહીં પડે. વ્યર્થ મહેનત કરો છો.'

વૃદ્ધે યુવાન તરફ જોયું. કંઈ બોલ્યા વગર એણે નીચે નમીને એક માછલી પકડી અને જોરથી દૂર પાણીમાં નાખી. પછી યુવાન તરફ વળીને કહ્યું: બેટા, આ એક માછલીને તો ફરક પડ્યો ને?’ (સારઃ પ્રત્યેક વ્યક્તિ એની ક્ષમતા મુજબ બદલાવમાં યોગદાન આપી શકે છે.)

***

બ્રેઈન ડ્રેઈનના પ્રવાહમાં ઘસડાઈને દુનિયાની માંધાતા ટેક કંપનીઓમાં ઉચ્ચ હોદ્દા પર કામ કરી રહેલા ભારતીયોમાં એક નામ સત્યા નડેલાનું છે. હૈદરાબાદમાં સંસ્કૃતની શિક્ષિકા માતા અને આઈએએસ પિતાના પુત્ર સત્યાનારાયણ નડેલા કમ્પ્યુટર સાયન્સ અને બિઝનેસ ઍડ્મિનિસ્ટ્રેશનની ડિગ્રી મેળવી અમેરિકાની સન માઈક્રોસિસ્ટમમાં કામ કરતા હતા અને પછી ૧૯૯૨માં માઈક્રોસૉફ્ટમાં જોડાયા હતા. માઈક્રોસૉફ્ટમાં એમના નામે ક્લાઉડ કમ્પ્યુટિંગનું ક્રાંતિકારી ઈનોવેશન બોલે છે.

નડેલાની નેતૃત્વકળાથી પ્રેરાઈને માઈક્રોસૉફ્ટમાં એમને ૨૦૧૪માં સીઈઓ બનાવવામાં આવ્યા હતા. બિલ ગેટ્સ અને સ્ટીવ બાલમેર પછી એ માઈક્રોસૉફ્ટમાં ત્રીજા અને પહેલા ભારતીય સીઈઓ છે. એમના સંચાલનમાં માઈક્રોસૉફ્ટની જબરદસ્ત પ્રગતિ થઈ છે. નડેલાએ આવતાંવેંત કંપનીમાં વૈચારિક અને કાર્યશૈલીમાં ધરખમ બદલાવ આણ્યો હતો. એમણે દુનિયાભરમાં પથરાયેલા સવા બે લાખ કર્મચારીઓને કામ કરવા માટે ત્રણ શબ્દો આપ્યા હતાઃ સંવેદના, સહકાર અને વિકાસ.

નડેલા કંપનીને પ્રૉફિટમેકિંગ બનાવવા માગતા હતા અને એના માટે એમણે નિખાલસ કૉમ્યુનિકેશન, સાહસિક ઈનોવેશન, નમ્રતા અને સંવેદનાસભર લીડરશિપ પર ભરોસો મૂક્યો હતો. એ માનતા હતા કે કંપનીનું વાતાવરણ કેટલું પોઝિટિવ અને ઊર્જાવાન છે એના પર સિદ્ધિ અને સફળતાનો આધાર છે.