ഷാപ്പുകവി

ദാനം നൽകുന്നതിലൂടെ ചെയ്ത പാപങ്ങളെല്ലാം ഇല്ലാതാകുമെന്നും അതുകൊണ്ടുതന്നെ ദാനം സ്വീകരിക്കുന്നവർ മഹാത്യാഗികളാണെന്നും ഷാപ്പുകവി പറഞ്ഞു വച്ചു

- കെ.കെ. പല്ലശ്ശന

എല്ലാ തിരുവോണത്തിനും നാട്ടിലെ ഒരു പ്രമാണി പരമദരിദ്രരായ കുറച്ചുപേർക്ക് ഭക്ഷണവും വസ്ത്രവും നൽകുന്ന പതിവുണ്ട്. പ്രമാണിയുടെ കാര്യസ്ഥൻ ഓണത്തിന് പത്തുദിവസം മുമ്പേ ദരിദ്രരെ കണ്ടെത്താനുളള അന്വേഷണം തുടങ്ങിയിരിക്കും. ഉടുതുണിക്ക് മറുതുണിയില്ലാത്ത യാചകർ, യാചകർ, പണിക്കു പോകാൻ കഴിയാത്ത വയോജനങ്ങൾ, അംഗവൈകല്യമുളളവർ എന്നിവർക്കിടയിൽ നിന്നാണ് അർഹരായ ദാനസ്വീകർത്താക്കളെ കണ്ടെത്തുക.

ഒരു തിരുവോണത്തിന് ദാനസ്വീകർത്താക്കളുടെ പട്ടികയിൽ ഷാപ്പുകവി പരമനും ഇടം പിടിക്കുകയുണ്ടായി. പറഞ്ഞ നേരം കൊണ്ട് പാട്ട് ഉണ്ടാക്കി പാടുന്ന പരമൻ നാട്ടിലെ പ്രധാന കവിയാണ്. എഴുത്തും വായനയും വശമില്ലാത്തതിനാൽ വാമൊഴിക്കവിയായി ഒതുങ്ങിപ്പോയെന്നു മാത്രം.