ടി.കെ. മാധവൻ പോരാട്ടം നിറഞ്ഞ ജീവിതം

 'ഇന്ത്യയുടെ രാഷ്ട്രീയ മതമാണ് എന്റെ മതം' എന്ന് പറഞ്ഞ സാമൂഹിക പോരാളിയാണ് ദേശാഭിമാനി ടി.കെ. മാധവൻ. ജന്മനാ ഉണ്ടായിരുന്ന അനാരോഗ്യവും വിട്ടുമാറാത്ത കാസരോഗവും ആ പ്രക്ഷോഭജീവിതത്തെ 45-ാം വയസ്സിൽ തല്ലിക്കെടുത്തി

- വി. രാധാകൃഷ്ണൻ

കുടിപ്പള്ളിക്കൂടത്തിലെ പഠന കാലത്താണ് ടി.കെ. മാധവന്റെ പ്രക്ഷോഭജീവിതത്തിലെ ആദ്യ കനലെരിഞ്ഞത്. സവർണ കുട്ടികളെ വടികൊണ്ടടിച്ചിരുന്ന നരിയിഞ്ചിൽ ആശാൻ കീഴ്ജാതിക്കാരായ വിദ്യാർഥികളെ അടിക്കാൻ മറ്റൊരു സൂത്രമാണ് സ്വീകരിച്ചിരുന്നത്. അവരെ പ്രത്യേക രീതിയിൽ വടികൊണ്ട് എറിഞ്ഞടിക്കുക. തൊട്ട് അശുദ്ധമാകാതിരിക്കാനുള്ള ഒരു മുൻകരുതൽ ഇത് പതിവായപ്പോൾ ആ ബാലൻ ഇപ്രകാരം പറഞ്ഞു: “ആശാന്റെ എഴുത്തങ്ങ് എടുത്തോ, എന്റെ ഓലയിങ്ങ് തന്നേക്ക്...” അത്രയും പറഞ്ഞ് പള്ളിക്കൂടത്തിന്റെ പടിയിറങ്ങി.

1885 സെപ്റ്റംബർ രണ്ടിന് ആലപ്പുഴ ജില്ലയിൽ മാവേലിക്കര കണ്ണമംഗലത്ത് ജനിച്ചു. പിതാവ് ആലുംമൂട്ടിൽ കേശവൻ ചാന്നാർ. അമ്മ കോമലേഴത്ത് ഉമ്മിണിഅമ്മ. അക്കാലത്തെ ഏറെ പ്രശസ്തവും സമ്പന്നവുമായ ഈഴവ കുടുംബാംഗമായിരുന്നുവെങ്കിലും അയിത്തത്തിന്റെ ഹീനമായ വേർതിരിവുകൾ മാധവനും അനുഭവിക്കേണ്ടി വന്നു. വിട്ടുമാറാത്ത കാസരോഗം മൂലം പഠനകാര്യത്തിൽ ഉദ്ദേശിച്ചപോലെ മുന്നോട്ടുപോകാനായില്ല. എങ്കിലും വിജ്ഞാനത്തിന്റെ സമസ്തമേഖലകളിലും അവഗാഹം നേടി. മലയാളത്തിലും ഇംഗ്ലീഷിലും ആകർഷകമായി പ്രസംഗിക്കാനും കഴിവുനേടി.

പഠനകാലത്തുതന്നെ പൊതു പ്രവർത്തനത്തിൽ തത്പരനായ മാധവൻ സഹപാഠികൾക്കൊപ്പം ചേർന്ന് കുന്നുകുഴി പിടാകയോഗം എന്ന സംഘടന രൂപവത്കരിച്ചു. പൗരസമത്വ സ്ഥാപനത്തിനായി 1902-ൽ ഈഴവസമാജം സ്ഥാപിച്ചെങ്കിലും എസ്.എൻ.ഡി.പി. യോഗം രൂപംകൊണ്ടതോടെ സംഘടനയെ അതിൽ ലയിപ്പിച്ചു. 1908-ൽ കയ്യാലയ്ക്കൽ നാരായണിയമ്മയെ വിവാഹം കഴിച്ചു. ശ്രീനാരായണ ഗുരുവിന്റെ ദർശനങ്ങളിൽ ഇതിനകം ആകൃഷ്ടനായിക്കഴിഞ്ഞിരുന്നു.

ആലുവ അദ്വൈതാശ്രമത്തിന്റെ നിർമാണത്തിനായുള്ള ധനശേഖരണത്തിന് ഗുരുവിനോടൊപ്പം മാധവനും സഞ്ചരിച്ചു. പൊതുപ്രവർത്തനം ശരിയായി നടത്തുന്നതിന് ഒരു പത്രം ആവശ്യമാണെന്ന് ബോധ്യപ്പെട്ട അദ്ദേഹം 1915-ൽ കൊല്ലത്തു നിന്ന് ദേശാഭിമാനി എന്ന പ്രതിവാര പത്രം ആരംഭിച്ചു. തുടക്കത്തിൽ ടി.കെ. നാരായണനായിരുന്നു പത്രാധിപർ. 1917-ൽ മാധവൻ പത്രാധിപത്യം ഏറ്റെടുത്തു.