പ്രതിരോധനയം തിരുത്തി ആയുധം വാങ്ങിക്കൂട്ടാൻ ജപ്പാൻ ഇറങ്ങുന്നു

സമാധാനകാംക്ഷികളെ ഏറെ ആകർഷിച്ചിരുന്ന ഭരണഘടന ജപ്പാൻ തിരുത്തുകയാണ്. ജപ്പാൻ പ്രതിരോധ നയത്തിൽ മാറ്റം വരുത്തുകയും ജി.ഡി.പിയുടെ രണ്ടുശതമാനം പ്രതിരോധത്തിനായി ഉപയോഗിക്കാൻ തീരുമാനിക്കുകയും ചെയ്തു. ലോകത്തിന്റെ സാമൂഹിക സാമ്പത്തിക അവസ്ഥകളെയാകെ ബാധിക്കുന്ന തീരുമാനമാണിത്

- ഡോ. സന്തോഷ് മാത്യു

ജപ്പാൻ അതിന്റെ പ്രതിരോധ നയം മാറ്റാൻ തീരുമാനിച്ചിരിക്കുകയാണ്. രാജ്യത്തിന്റെ ജി.ഡി.പി.യുടെ രണ്ട് ശതമാനം ഇനി പ്രതിരോധത്തിനായി ഉപയോഗിക്കും. രണ്ടാം ലോകമഹായുദ്ധം മുതൽ അനുവർത്തിക്കുന്ന പ്രതിരോധ നിഷ്പക്ഷ നയമാണ് ജപ്പാൻ തിരുത്തിക്കുറിക്കുന്നത്.

പുതിയ നയം വരുന്നതോടെ ആയുധം വാങ്ങിക്കൂട്ടുന്ന രാജ്യങ്ങളുടെ പട്ടികയിലെ രണ്ടാമനാകും ജപ്പാൻ. സൗദി അറേബ്യയാണ് ഒന്നാംസ്ഥാനത്തുള്ളത്. രാജ്യത്തിന്റെ ജി.ഡി.പി.യുടെ രണ്ടുശതമാനം അടുത്ത അഞ്ചുവർഷം ചെലവഴിക്കാനാണ് തീരുമാനം. ഇതുവരെ ഒരു ശതമാനമായിരുന്നു ഇതിനായി ഉപയോഗിച്ചിരുന്നത്.

ജപ്പാൻ ഏഴര പതിറ്റാണ്ടായി തുടർന്നുവരുന്ന സമാധാന സഹവർത്തിത്വം എന്ന ഭരണഘടനാധിഷ്ഠിത നയത്തിൽനിന്നുള്ള കാതലായ മാറ്റത്തിന് നിയമനിർമാണ സഭയായ ഡയറ്റിന്റെ ഇരു സഭകളും അംഗീകാരം നൽകി. യാഥാസ്ഥിതിക കക്ഷിയായ ലിബറൽ ഡെമോക്രാറ്റിക് പാർട്ടി അംഗമായ മുൻ പ്രധാനമന്ത്രി ഷിൻസോ ആബെ സൈനിക പാരമ്പര്യത്തിലേക്ക് തിരിച്ചുപോകണമെന്ന പക്ഷക്കാരനായിരുന്നു. ആബെയും അദ്ദേഹത്തിന്റെ പാർട്ടിയും 2012-ൽ അധികാരത്തിൽ തിരിച്ചെത്തിയതു മുതൽ ആർട്ടിക്കിൾ ഒൻപത് പൊളിച്ചെഴുതണമെന്ന് വാദിക്കുകയായിരുന്നു.

ഉപരിസഭയായ ഹൗസ് ഓഫ് കൗൺസിലേഴ്സും അധോസഭയായ ഹൗസ് ഓഫ് റപ്രസന്റേറ്റീ വും ഇപ്പോഴത്തെ പ്രധാനമന്ത്രി ഫുമിയോ കൃഷിദോയോടൊപ്പം ഉറച്ചു നിൽക്കുന്നുണ്ടെങ്കിലും പൊതുജനാഭിപ്രായം ഭരണകൂടത്തിന് എതിരാണ്. ജപ്പാന്റെ ഔദ്യോഗിക വാർത്താ ഏജൻസിയായ ക്യോഡോ നടത്തിയ അഭിപ്രായ സർവേ പ്രകാരം സർക്കാരിന്റെ ഭരണഘടനാ ഭേദഗതി നീക്കങ്ങളെ 80 ശതമാനം ജനങ്ങളും എതിർക്കുകയാണ്. സർക്കാരിനുള്ള ജനസമ്മതി ഗണ്യമായി കുറയുകയും ചെയ്തു.